E no ta un situacion cu ningun partido politico ni ningun Gobierno ta desea pa haya nan mes aden, pero e ta bin cu tempo y despues di hopi promesa sin cumpli cu nan. Awe nos a nota un tendencia masha peligroso, ora cu sindicato FTA a opta pa drenta Bestuurskantoor y exigi pa papia cu e minister na e momento ey. E por zona un poco bruto y e actitud por mustra violento tambe, pero e tin mas di haber cu gobierno ta perdiendo autoridad moral den comunidad y pueblo no ta respeta e gobernantenan mas.
Awe a nota cu pasenshi di e empleadonan di Aruba Airport Authority a caba y no tabata dispuesto di warda riba e minister mas tampoco. E sindicalista Rudy Geerman, como ex-presidente di sindicato FTA, ultimamente ta masha activo atrobe den e sindicato. El a opta pa drenta paden cu e trahadonan y a exigi pa minister Oduber baha papia cu e trahadonan awo. Esaki pasobra nan tabata biniendo caba pa presenta un manifiesto, pero cu e mandatario a opta pa tene un conferencia di prensa.
Cu e tendencia di awe, ta demostrando e mandatarionan cu e retonan laboral y social pocopoco ta yegando Bestuurskantoor y ta drenta paden cu forsa bruto. Cu e situacion financiero cu nos pais ta aden actualmente y e forma con gobierno ta manehando e crisis, no ta laga luga na duda cu e presion social lo aumenta mas. Awe e miembronan di siguridad di CEA y e “body guard” di ministernan presente a logra contene e situacion bou control, pero e si e tendencia aki sigui crece, anto por spera escalacion den e dianan nos dilanti.
