Kòrsou awe ta konta ku mas di 70 landfill klandestino rònt Kòrsou, a keda demostrá ku si no bin un akshon di limpiesa nashonal kaminda nos sosiedat kompleto ta drenta den akshon pa limpia rònt Kòrsou i ku nos por kore yega Landfill di Gobièrnu i tira sushi afó pa un periodo di grasia sin ningun gasta envolví, nos lo sigui hiba awa laman.
Den kurso di e luna aki ta inisiá diferente akshon di limpiesa rònt Kòrsou. Esaki den kuadro di nos obligashon síviko pa no solamente mantené Kòrsou limpi, pero tambe pa protehé nos komunidat kontra di sanguranan ku lo por okashoná kualkier malesa na nos dushi abitantenan.
Na aña 2016 e akshon di limpiesa ku Fundashon Gerrit Schotte i MFK yama “I Love Curacao Clean” i boluntarionan a inisiá dia 4 di mart 2016 a yega na e sifra rèkert di 1.5 mion kilo di sushi depositá na landfill Mal Pais durante trabounan 7 luna largu (Riba e tabla athunto por mira e kantidat di sushi ku a wòrdu rekohé i den kua area di Kòrsou).
Te kaminda tabata posibel a duna un man i hasi posibel pa e mini-landfill nan aki a wòrdu limpia i krea un ambiente mas saludabel pa esnan ku ta abitá serka di e sitionan aki kaminda sushi nan ta wòrdu depositá i ku por tin komo konsekuensia brote di sanguranan ku ta sumamente peligroso pa salu di e ser humano. Pero manera nos a indiká nos a hiba awa laman, paso e situashon ta meskos òf mas malu awe.
| Bario | Feb | Mar | Apr | Mei | Jun | Jul | Oug | Total |
| BOCA SAMI | 223060 | 85440 | 308500 | |||||
| CAS GRANDI | 13230 | 13230 | ||||||
| CHOLOMA | 7170 | 7170 | ||||||
| KUSTBATERIJ | 19520 | 196060 | 500 | 216080 | ||||
| OTROBANDA | 10890 | 12040 | 85340 | 108270 | ||||
| SALINJA | 1590 | 920 | 2510 | |||||
| STA ROSA | 7150 | 48510 | 55660 | |||||
| STEENRIJK | 150870 | 42900 | 51500 | 12640 | 257910 | |||
| STENEN KORAAL | 21810 | 21810 | ||||||
| AREA DI SITEK | 57660 | 57660 | ||||||
| MONTEVERDE | 80070 | 80070 | ||||||
| CHERASIEL | 59520 | 26100 | 85620 | |||||
| STAKAMAHACHIWEG | 47250 | 47250 | ||||||
| RONDE KLIP | 77720 | 77720 | ||||||
| MON REPOS | 83710 | 83710 | ||||||
| WEG NAAR FUIK | 62010 | 62010 | ||||||
| Total | 19,520 | 602,870 | 228,420 | 85,340 | 51,500 | 200,740 | 296,790 | 1,485,180 |
Pa e akshon ku ta bai kuminsá awor, ta imperativo pa gobiernu i Selikor realisá ku e proyekto aki ta pa bunitesa di Kòrsou i tambe pa bienestar i salú di nos pueblo di Kòrsou. Konsekuentemente nos kier hasi un apelashon riba tantu gobiernu i Selikor pa bini ku un periodo di grasia pa por depositá sushi nan rekohé na landfill nan di Gobièrnu manehá dor di Selikor.
Ademas si no atendé ku e proyekto pa kombertí sushi den koriente. Lo kontinuá basha sushi i tapa esaki, loke ta un proseso robes den e tempu moderno ku nos ta biba aden. For di Febrüari 2011 a indiká ku mester kuminsá kima sushi den fòrnu nan ku ta kombertí esaki den koriente, tur kalkulo ya a wòrdu hasi i sa eksaktamente kuantu koriente lo por generá i na preis barata, pero den e último 6 añanan a laga e proyekto aki drumi.
MFK ta proponé tambe pa Gobièrnu bini ku un maneho pa duna insentivo na nos pueblo ora e trese su sushi na e lugar korekto.
Pa por tin un solushon duradero mester tin un periodo di grasia i kambia maneho di sushi pa sushi ku lo ser kima den fòrnunan ku ta kombertí esaki den koriente barata pa e ret di koriente di nos pais.
