Un rato pasa coriente a bay den varios area tur rond di nos isla. E areanan afecta te cu awor ta Calbas, Tanki Leendert, Piedra Plat, y Macuarima. Kico ta e causa cu coriente a bay no ta conoci. Tanto N.V. Elmar como WEB Aruba N.V. a cuminsa investiga kico por ta e causa.
Sinembargo, un rato pasa a confirma cu entretanto a logra identifica y isola e fayo y a cuminsa e proceso di recuperacion. Ta calcula cu lo dura mas of menos 1 ora pa recupera suministro di coriente den e diferente barionan.
Mester menciona cu baymento di coriente constantemente asina ta manca nos economia, cu apenas ta recuperando di un pandemia y caida pisa den benta. Un parti di negoshinan mester a cera pa motibo cu no tin coriente, mientras cu e otronan no por a efectua pago pasobra door cu coriente a bay, Setar a hay’e den problema cu su red di internet y data. Hopi negoshi ta transmiti transaccionnan bancario di nan mashinnan di POS via e mesun sistema di internet.
