“Hulanda ta habri pa cera conoci mas cu nos cultura. A pesar cu nos ta den mesun Reino, e ta un otro mundo, nos cultura ta diferente y mi sa cu Aruba ta hopi rico den cultura, vooral den musica, manera nos Dande”, asina Shannon Bueno a bisa. E ta un studiante na Koninklijk Conservatorium na Den Haag y tabata por lo menos un di e studiantenan invita pa papia cu Su Altesa Real, Prinses Beatrix, durante di e ceremonia organisa pa Genootschap Nederland-Aruba. El a sinti su mes masha honra di tabatin e oportunidad pa papi cu miembro di famia Real, pa e por gaba su isla!
Pero esaki no ta e unico aparicion di Shannon Bueno den representacion di su isla. Recientemente a tuma luga tambe un evento organisa pa UNICEF na Hulanda. Na dado momento, a menciona nomber di Aruba y ey tambe el a haya un bon chens pa gaba y promove nos isla. Imagina bo cu a papia di nos “Dande” durante e encuentro, memey di hopi hende for di tur parti di mundo.
Shannon Bueno no ta desconoci na Aruba pasobra e tin masha afinidad pa cantamento. E tin pensa di sigui canta tambe, banda di su estudio cu e ta haciendo na Hulanda pa na final e bira un maestra di scol, pa siña studiantenan riba educacion musical. E ta convenci awo, tambe despues di e investigacion haci na Aruba, cu tin hopi espacio pa sigui desaroya musica na Aruba y con miho haci esaki via educacion musical na scol y door di siña nos hobennan conoci cu nos cultura musical.
