Recientemente Monumentenbureau a organisa un ceremonia di despedida pa nan director, Ing. Yvonne Webb-Kock, cu a tuma luga na El Gaucho. Aki tabata presente e team di Monumentenbureau hunto cu Minister di Finansas y Cultura, mr. Xiomara Maduro. Ing. Yvonne Webb-Kock a sirbi nos pais pa 33 aña largo.
Ing. Yvonne Webb-Kock a drenta den servicio di gobierno dia 1 september 1989 y a cuminsa traha na Dienst Openbare Werken Aruba (DOW) den e departamento civil y despues a traslad’e pa architecten bureau di Dienst Openbare Werken Aruba (DOW). Den e departamento aki Ing. Yvonne Webb-Kock a diseña e edificio di “Directie Luchtvaart” y e “Kleuterschool School Preparatorio Nos Paraiso” situa na Paradera. Tambe a traha riba mantencion di e edificionan di gobierno.
Den transcurso di aña, Monumentenraad a bin cu un proposicion pa lanta un departamento di monumento. Aki Ing. Yvonne Webb-Kock a hay’e hopi interesante y a pidi un cambio di trabou (overplaatsing) pa lanta e departamento di monumento y a bira directora di Monumentenbureau. Aki el a traha 27 aña como director na dicho departamento.
E prome proyecto di restauracion encabesa pa Ing. Yvonne Webb-Kock pa Monumentenbureau tabata:
- Restauracion di Stadhuis (Elloy Arends) hunto cu Hotel Colombia
- E edificio nobo di Censo cu a bin (net entre) e dos monumentonan cu a conecta nan cu otro
- Ecury Complex caminda National Archaeological Museum Aruba ta ubica
- E restauracion y expancion di e edificio di Corte (Gerechtsgebouw Aruba) situa na J.G. Emanstraat 51, esaki ta e proyecto mas gusta p’e.
- E edificio di ARA situa banda di Elloy Arends (Stadhuis)
- Henriquezpand situa na Schelpstraat 36,38 cu actualmente ta e oficina di Monumentenbureau
- Huisje Wild situa banda di Monumentenbureau
- Vuurtoren (California) situa na Hudishibana
- Cas Ceremonial pa Gobernador situa na Maria Christinastraat 2
- Bestuurskantoor situa na L.G. Smith Boulevard 76
- Watertoren Oranjestad y na San Nicolas
- E grafnan colonial situa na diferente caminda na Aruba
- Y varios proyecto mas cu el a lidera den nan restauracion y mantencion.
E proyecto cu a hala mas atencion den nos comunidad tabata e mudamento di e cas di Aruba Bank cu tabata situa den caya grandi y awor ta den Weststraat, unda actualmente Patio 15 ta situa.
Durante e 27 aña como director, a inverti mas di 60 miyon florin den restaura y mantene nos monumentonan. Tambe el a organisa varios Paseo Monumental, a fungi como mentor y guia diferente stagaire pa por studeeraf nan estudio.
Como conocedo di arkitectura di Aruba, Ing. Yvonne Webb-Kock a duna varios biaha charla (lezing) na maestronan di scol. A representa Aruba diferente biaha den exterior pa por duna workshops tocante di nos herencia monumental. El a prepara y propone e beslastingafrek y overdrachtsbelasting pa monumento cu awor ta hancra den ley.
Pa 27 aña a fungi tambe como secretario di monumento (monumentenraad). Danki na su empeño a lanta e interes di cuido di monumento na Aruba. Ta consider’e como un experto den monumento na Aruba. Su coleganan di Monumentenbureau ta gradicie pa su guia personal, laboral y tur locual el a logra haci pa henter e comunidad di Aruba durante tur su añanan di servicio.
Monumentenbureau ta desea Ing. Yvonne Webb-Kock tur clase di exito den e etapa nobo den su bida. Actualmente e ta gosa di su vakantie y entrante prome di januari 2023 lo baha cu pensioen bon mereci, yena cu trankilidad. Aruba y Monumentenbureau lo haya falta di Yvonne sigur, sinembargo e luz cu el a cende lo sigui briya pa semper.