Aruba Softball Bond trahando duro cu su atletanan pa por tin un seleccion femenino competitivo pa cu campeonato di CONSURSA cual lo tuma lugar 26 di October pa 3 di November e aña aki.
Kiko ta CONSURSA? CONSURSA ta Confederacion di softball Suramericana afilia na WBSC esta World Baseball and Softball Confederation. Aruba pa promer biaha den historia di softball lo “host” pues ta bay ta sede di un campeonato internacional oficial. Un total di 8 pais a confirma nan participacion.
Brasil, Argentina, Peru, Ecuador, Colombia, Venezuela, Curacao y Aruba lo bay ta batayando pa medaya. Na October 2017 Endy Croes y Chipen Chirino a atende Congreso Mundial di WBSC na Botswana Africa unda e oportunidad aki a presenta pa Aruba “host” dicho campeonato y mesora a confirma esaki.
Asina otro paisnan grandi tambe a confirma diferente otro competencianan tanto masculino y femenino di diferente categoria. Aruba Softball Bond hunto cu e Comision Organisador lo tin trabownan duro den e dos lunanan nos dilanti pa coordina tur logistica y prepara e terenonan debidamente. Mientrastanto bou encargo di e Director Technico di ASB Estefano Croes hunto cu e Staff Technico consistiendo di Luis Pire entrenador internacional, Rayborn Didder y Lucio Geerman e selecion ta trahando fuerte 4 ves pa siman y pronto lo subi esaki na 5 ves pa siman.
Aruba por spera un bunita siman di competencia den October cu 8 pais entotal batayando te final.
