Diaranson mainta San Nicolas Business Association, Aruba Tourism Authority (ATA) y Aruba Excellence Foundation a firma un Memorandum of Understanding (MoU). Esaki ta pa sigui riba e proyecto cu San Nicolas Business Association y Aruba Excellence Foundation a cuminsa riba dje, pero ta haci awo cu sosten di ATA.
Ronella Croes, CEO di ATA, a splica cu nan a tene un sesion hopi amplio cu San Nicolas Business Association y a sigui papia riba diferente detaye. No ta un secreto cu San Nicolas Business Association ta hopi envolvi den hopi desaroyo cu ta pasando aworaki y ta un bos na mesa tambe.
Hopi bes ATA ta acerca e asociacion pa duna opinion riba diferente proyecto. Pero tambe pa yega n’e comunidad di San Nicolas y vecindario pa haya input di nan prome cu ehecuta cierto proyecto. E MoU ta basicamente formalisacion di diferente componente. Tin diferente topico cu ta inclui den e MoU. Croes a referi na branding, cual prome cu pandemia a traha riba uno specifico cu ta identifica San Nicolas.
Aruba tin su marca y imagen. Segun Forbes Magazine, a yama San Nicolas e capital di arte pa Caribe. Esey ta exigi di ATA pa no solamente sigui traha riba e trayecto di sigui duna esaki contenido, pero traha riba un branding banda di Aruba pa logra posiciona San Nicolas diferente tambe.
Errol de Freitas, presidente di San Nicolas Business Association, a expresa di ta orguyoso dje manera con ATA a acerca e situacion cu a cubri tur cos completo. Asina ey nan tin e oportunidad grandi pa San Nicolas cu e asociacion a firma e MoU cu Aruba Excellence Foundation y ATA. Esaki ta encera un extension y un muestra di e relacion continuo cu nan ta sigui p’e desaroyo di pariba di brug y San Nicolas.
Shadey Figaroa, di Aruba Excellence Foundation, a indica cu ta hopi importante pa nan cu comunidad ta bon educa. Educa corectamente over e historia di Aruba. Awo cu tur proyecto andando pa San Nicolas, segun Figaroa, nan ta sumamente entusiasma pa cera un comprondemento cu ambos asociacion cu e fundacion ta bay duna e trainingnan necesario pa comercio y comunidad di San Nicolas.
