Hopi ta e kehonan cu ta drenta diariamente pa loke ta nos salubridad publico, y e caso cu nos ta bay conta aki, no ta un excepcion. Ta trata di e cabayero, kende nos ta bay nombra como RV y e ta pidi pa director di hospital, director di AZV y Minister di Salud Publico pone bon atencion riba esaki.
E ta conta den su mesun palabranan: “Mi tabata tin un griep fuerte cu a dura dos siman, cu keintura, tosamento, calafriu y dolornan di weso. Mi no tabata tin apetit y hasta, mi a perde 3 kilo. Mi tabata cansa hopi y mi no tabata halando bon rosea. Mi dokter di cas a mandami saca un Xray y e dia siguiente e ta yamami, y a bisami pa mi bay di emergencia pa mira un cardiologo, cu mi tin e arteria di e pulmon basta hincha y e aorta geel.”
Esey, pa e cabayero aki, tabata un susto y miedo, despues cu nan a bis’e esey. El a bay na Spoed Eisende Hulp y a warda mas di dos ora pa wak un dokter. Nan a haci un EEG chikito y a bis’e cu ta algo normal. Nan a saca un tiki sanger pa wak e Potasium y e tabata bon. Nan a bis’e pa bay wak e cardiologo e dia siguiente y nada mas.
Hospital a traha un anexo nobo, na luga di cumpra ekiponan nobo y tin mas cu un di un solo ekipo. Asina nan por atende mas di un pashent pareu y no tin cu warda casi dor ora pa un EEG (Electrocardiogram). Tin bon empleadonan na hospital, e ta splica, pero nan tin nan mannan mara. Dicon no ta manda algun pa sigui un curso den exterior, manera e Cardio Infantil den e departamentonan cu nan ta traha aden?
RV ta sigui: “Dialuna mi a yama e cardiologo pa un cita y nan a dunami dentro di 7 dia. Mi a bay wak e cardiologo y nan a mandami haci 3 test na hospital. Mi a sali y a bay hospital di biaha y nan a bisami na recepcion, cu nan lo yamami pa dunami e citanan. Despues di a warda un siman sin sa nada di hospital, mi tabata nervioso y mi tabata tin miedo cu mi lo a bay haya un ataca di curason of zo. Mi a dicidi di bay na Cardio Infantil na Bogota, pasobra AZV a mandami 9 aña pasa pa mi bay opera di Fibilacion di Curason. E procedimento di e operacion aki, ta wordo haci na 3 luga na mundo y tabata na Huston, Texas, Hulanda of Bogota. Mi a dicidi di bay Bogota, pasobra e ta mas cerca. Esun cu a operami tabata dr. Carlos Saenz, kende ta specialista den “Electrofisiologia”. Nan a operami y mi no a haya fibilacion mas, ni tampoco mester a tuma remedi. Mi a mira e limpiesa y e gentilesa di e enfermeranan y manera e ta asina profesional y asina lihe pa atende un hende na e Cardio Infantil. Mi a yama y mi a bisa nan e dia cu mi ta bay y nan a avisami dentro di un dia, cu mi tin 5 cita riba e prome dia desde mi yegada y dos e dia despues y uno e dia siguiente. Lo ta 8 examen den 3 dia.
Mi no por a kere di e profundidad di e examennan y e ekipo cu nan a uza. Mi no a warda di 5 pa 10 minuut pa e examennan.
E examennan cu nan a haci, mira dr. Saenz y su ekipo, cu a revisami, laboratorio pa saca sanger y urina, electrocardiograma, prueba di ehercicio cardiopulmonar integra, Ecocardiograma transtoracico, radiografia di torax, gammagrafia y cita cu e cardiologo.
E resultado ta cu mi no tin loke nan a pensa cu mi tabata tin , na Aruba. Cu e griep fuerte aki, por a causa hopi mas cos y demora e recuperacion. Ki alivio.“
Segun RV, un hende por kere cu Surinam, Boneiro, St. Maarten, Corsou, ta manda su pashentnan na Cardio Infantil y Aruba, antes nan tabata mandanan eynan y awo ta mandanan na Bucaramanga, cu no tin e mita di e calidad di profesional, ni ekipo. Kico a pasa? AZV y e minister ta pensa cu e mesun Arubianonan no merece lo miho? Tin cu pensa riba e ancianonan, e babynan, mucha y adulto.
Tambe pa bay Bogota, solamente ta 1 ora y 40 minuut, mientras cu pa bay Bucaramanga, e ta mas di 4 ora y mey, pasobra mester haci un escala na Bogota.
RV ta sigui conta cu nan a yam’e durante atardi cu e cita pa curason ta pa dia 22 di October, pa 8’or di mainta. Con por ta posibel cu algo cu tin di haber cu un arteria y aoerta (segun e conclusion di radiografia), ta tarda un luna y mey pa confirma algun cita, ora cu a pidi pa haci mas cu 3 siman?
E Arubianonan ta paga hopi pa AZV y Hospital tin cu pone su mes al dia cu ekipo, cu ya nos ta den 2017. Hopi hende ta sali pa Colombia y Venezuela, pasobra nan no ta ricibi e atencion adecuado y no tur conclusion ta corecto, ni e remedi receta. Tambe, Paracetamol, no ta cura tur cos.
Nos ta menos di un luna for di e eleccionnan y esaki mester ta un prioridad pa e Minister di Salud Publico y e prome minister Mike Eman. Tin hopi caso, pero nan no ta publica pa no busca problema, RV a bisa finalmente.
