Abogado Hans Sjiem-Fat tabata tin un caso cu el a defende den corte y esaki tin di haber cu un trahado di Banco Central. El a conta riba e historia di e caso aki y finalmente con el a bring’e y hues a tuma un decision tambe.
Sjiem-Fat a splica cu tabata trata aki di un caso di sra. Hart, kende tabata traha den e departamento di estadistica y e tabata casa cu un sr. Koolman, kende tabata traha na Setar. Koolman tabata envolvi den un campaña di fraude supuestamente, unda el a estafa Setar, segun acusacionnan di Setar, uzando un compania offshore na British Virgin Islands.
Awor sra. Hart a wordo kita for di trabao door di Banco Central, pasobra el a wordo menciona den publicidad riba e asunto aki y e no tabata di acuerdo cu e retiro y p’esey el a bring’e. E argumento cu el a trece dilanti den e caso ta cu e no por yuda cu su ex casa, pasobra nan a divorcia, tabata envolvi den actonan fraudulento supuestamente, pa loke ta su doño di trabao, Setar y e no por a yuda cu tabata tin publicidad riba e asunto eynan.
Sra. Hart mes no tabata tin arte ni parte den e acusacionnan di actonan fraudulento. Pa e motibo eynan e tabata haya cu e retiro no tabata husto. Corte a trata e caso y corte a bay di acuerdo cu e hecho di simplemente publicidad cu tabata tin over di e asunto, no tabata suficiente pa kita un trahado for di trabao, vooral si mester tene cuenta cu e hecho cu no tin ningun prueba cu e mes tabata envolvi den actonan fraudulento y cu el a comete estafanan financiero. Esey tabata e decision y decision tabata cu e retiro no tabata husto y cu Banco Central mester tuma e trahado bek den servicio.
Afkoopsom
Sjiem-Fat a splica cu ta asina cu corte a stipula un suma, es decir un afkoopsom, cu Banco Central por paga si Banco Central no kier tum’e bek, cual suma nan a paga di biaha, pasobra nan no kier a sigui cu e trahado aki. E trabao a caba, pero el a haya e suma cu corte a stipula.
Deseo di cliente
Na prome trabao sra. Hart kier a haya su trabao bek y di dos luga e tabata masha decepciona cu e trato cu el a ricibi di Banco Central, pasobra el a atacha su reputacion y cos positivo di e decision en todo caso ta, cu corte a confirma cu no tabata tin ningun acto iregular, fraudulento di su parti den henter e asunto aki. Esey ta un punto importante cu segun e abogado, cu e cliente a keda satisfecho cun’e.
Y kico awo
Segun abogado Sjiem-Fat, por ta e lo busca otro trabao, of traha riba su mes. E ta un accountant tambe. Por ta e por habri su mesun negoshi. Esey no a dicidi ainda.
Un pago inmediato
Banco Central a paga e suma di inmediato. Nan no tabata tin deseo pa papia riba un futuro y nan kier a paga e suma mesun dia di e decision. Nan a paga e suma cu a wordo stipula door di corte. Corte a stipula cu nan mester a paga un suma di 220 mil florin, pero kitando e sumanan cu el a ricibi caba dia cu el a wordo retira for di trabao. Tempo cu e cliente a wordo retira, e no a bay di acuerdo cu e retiro. Aunke el a acepta e pago.
Tur cos a caba
Te asina leu, ta posibel cu Banco Central por apela e decision. Sra. Hart tambe por apela e decision. Pero Sjiem-Fat no ta kere cu tin un decision caba over di esey di parti di Banco Central of di parti di sra. Hart.
