Critica ta algo cu mester haci, pasobra sin haci esey e ora problema no ta bay cambia. Ta importante pa trece dilanti unda un fout ta sinta manera den caso cu e rapport di Carmabi tabata scondi y Raiz a yuda tap’e.
Ryçond Santos do Nascimento, parlamentario independiente, a reacciona hopi bes riba old school boys, pero tambe cu Raiz tampoco ta sirbi. El a expresa cu no ta asina pasobra durante diferente ocasion su punto di salida ta cu tur ta pecado, ningun ta perfecto. E ta kere den un critica fuerte. E parlamentario ta kere cu mester di un critica fuerte pasobra sin critica, sin papia e berdad, pone luz riba e problema no ta bay cambia nada.
E prome cos pa combati corupcion ta transparencia. Si no trece cos na luz, nada ta cambia. Ora di mira un partido manera Raiz kier play duro por ehempel cu Eagle LNG, cu kier play duro cu BBO na frontera, cu kier play duro por ehempel cu minister ta lanta caso contra su mesun gobierno. Mester bisa cos manera e ta. E partido no ta sirbi, di unda e ta haya conseho, e parlamentario kier sa cu kico nan ta bezig. “Mi a gusta loke Speed a bisa”, el a expresa. “Bo tambe ta para pa naturalesa y esey ta importante.” E ta haya cu mester pone tur cos den balansa.
Con Raiz ta acerca henter e cuenta di naturalesa, Santos do Nascimento tin un critica grandi pasobra tin un interes hopi grandi den e parhanan y yerba. E conexion cu hende e no ta mira den area di Parkietenbos, e no ta mira esey ora a habri e sluis di awa di pupu cu ta bay lama.
Si tabata na Florida, nan ta pone borchi si awa di pupu bay awa y informa pa no landa eynan. Segun e rapport di Carmabi, 32 persona di cada mil mester bira malo di e tipo di contaminacion cu tin.
Locual Raiz a haci ta colabora na sconde e rapport. Un persona a duna e parlamentario e rapport cu asina el a public’e y asina ey Carmabi a bin publica e rapport final na januari. Si no tabata p’e trabou ey, no lo wak e rapport ey. Pueblo no lo a lesa e rapport ey. Ken ta esun cu a colabora den sconde e rapport ey, esey ta partido Raiz. Ora di scucha Ursell Arends bon, su proposito ta pa duna e rapport na mochi mochi.
