E fin di siman aki Aruba ta anfrition di e di dos “Challenge Aruba Endurance Festival”. Mas di 400 atleta internacional y local lo participa den e Challenge Aruba Triathlon cu lo tuma lugar riba Palm Beach, Eagle Beach y tambe riba e ruta di Malmok. Pa e organisacion ta importante pa comunica cu Aruba en general incluyendo stakeholders manera Hotel, Busnan y Taxinan riba e cambio di rutanan cu lo tin ariba diadomingo awor dia 22 di October. Pa por percura pa e seguridad di e atletanan kendenan lo bay landa, core bicicleta y core na pia algun caminda lo ta sera for di oranan di diasabra marduga te cu diadomingo merdia.
Ta trata aki primordialmente di e caminda Juancho Yrausquin Boulevard dilanti di Hyatt Regency Hotel cu lo ta sera for di diasabra 11 or di anochi te cu diadomingo despues di merdia. Diadomingo pa 6 or y 21 di mainta e triathlon mes lo cuminsa unda e atltenan lo cuminsa cu landamento cual lo ta entre Hyatt Hotel y Hilton Hotel. Despues lo continua e parti di coremento na pia y coremento cu bicicleta. E sigiente arenan no lo ta completamente sera pero si cu menos acceso pa vehiculonan. Aki lo por topa cu atletanan den accion. E areanan lo ta Palm Beach y Eagle Beach pasando entre otro Riu, Amsterdam Manor, Alhambra, Divi Hotel, Sasaki Weg, Malmokweg ,Tierra del Sol, Arashi, Lighthouse y finalmente na Hyatt Hotel. Pa loke ta Sasaki Weg solamente un banda (Banda Robes) di caminda lo ta habri. E otro banda lo ta pa atletanan y servicionan di emergencia.
Aruba complete ta keda invita pa para riba e ruta of na e start / finish pa asina apoya nos atletanan local y internacional cu lo participa den e 2017 Challenge Aruba Triathlon. Un evento cu sigur tin su efecto positivo den nos economia y tambe bida active. Pa mas informacion www.challenge-aruba.com
