Dakota a gana Estrella den su prome salida

Diamars anochi e campeonato di futbol 2017-2018 a continua cu e encuentro di SV Estrella y SV Dakota. Un wega cu tur dos team a busca pa bay cu e prome 3 puntonan, a termina na fabor di SV Dakota cu e score di 4-1.

 

Den 13 minuut di wega Dakota a bay ariba cu gol di Roy “Killer” Albert Francis, unda cu nan a keda busca pa anota mas gol. Nan ta bin logra esaki 7 minuut despues ora cu Juel Balentien a ricibi e oportunidad pa anota e di 2 gol. E velocidad di Dakota no ta baha y na 36 minuut Ricky Hodge a anota e di 3 gol. Na diferente ocasion Estrella a yega hopi cerca pa anota un gol, pero nan no tabata probecha di e oportunidadnan ricibi. E prome mita a bay aden 3-0 pa Dakota.

 

Den e di dos tempo di e wega Estrella a subi tereno dicidido pa anota gol unda cu nan a pone mas presion riba Dakota. Alex Hassell di Estrella a comete un infraccion y a ricibi carchi geel na 68 minuut di wega. Na 70 minuut di wega Dakota a comete un infraccion den area di gol y Estrella a ricibi un tiro di pinalti. Norviel Naar a tuma e tiro na 71 minuut y a anota e prome gol pa Estrella. E wega a continua unda cu Dakota a sigui busca pa anota y a logra esaki door di Kiano Maduro, kende a anota e di 4 gol.

 

Director tecnico di SV Estrella, Arthuro Charles, a splica cu e wega no a bay manera nan tabata kier. Den 20 minuut di wega Dakota a domina y a probecha di e erornan di Estrella. Den futbol uno mester probecha di e oportunidadnan cu e ricibi pasobra si abo no haci esey y e contrincante si, bo ta haya bo den problema. P’e siguiente wega Estrella lo bin fuerte y nan lo drecha algun cos chikito.

 

Coach di Dakota, David Abdul, tabata contento cu e resultado di e wega unda cu e team a probecha di anota gol na momento cu nan a haya esaki. E wega aki tabatin 2 cara, na final Dakota a domina y merece e 3 punto. E punto aki tabata importante contra un tremendo team. Dakota lo analisa e wega aki pa mira unda pa drecha. Diasabra awo nan lo ta enfrentando e campeon di aña pasa cu ta un tremendo team. Nan lo tin 2 wega hopi dificil tras di otro, pero compara cu aña pasa a domina wega y no tabata anota gol, e aña aki esaki ta otro unda cu ta probecha di anota durante wega.