Na Meiveld 21 ta biba tres ruman homber den un cas estilo bieu y no tin bentana, porta, awa ni luz. Nan ta ricibi yudansa di un iglesia, kendenan ta baña nan y trece cuminda. Sigfried Kelly e ta invalido y gobierno no ta yud’e, pero tampoco e tin entrada.
E no ta ricibi onderstand y hopi hende ta mir’e como choller, pero e no ta. Segun Sigfried Kelly, e no ta droga mas pa hopi tempo, pero no ta dun’e onderstand pasobra ta pensa cu ta pa droga. El a pidi hopi tempo pasa pa onderstand pero nan tin e wanta abou. No ta ricibi niun placa for di gobierno, no ta firma p’e por haya awa pa baña y hendenan di iglesia ta trece awa, el a bisa.
E ruman Emiliano Kelly si ta ricibi onderstand, pero ta buscando yudansa na gobierno. E no por biba cu e suma di 450 florin pa luna. El a pidi pa nan hisa su onderstand, pero nan a bisa su persona cu dokter mester firma p’e. P’e por sobrevivi den e cas, e mester uza tiki tiki e placa pa cumpra cuminda, pidi bisiña pa awa.
Sigfried Kelly a haya un stroke y esaki a lag’e mita lam. E tin 3 luna di a sali for di hospital. El a yega di cay y si no tabata pa su ruman cu a yega, e lo a keda benta abou. E ta contento di e yudansa di esunnan di iglesia, kendenan ta resa pa nan. “Tin biaha mi ta haya nan falta ora cu nan bay,” el a bisa. E ta keda su so y no mag di lanta for di cama.
Loke cu Sigfried Kelly ta pidi ta pa gobierno lag’e keda den cas di hende grandi. Nan no kier firma pa yud’e y na cas di hende grandi ta cobra 1000 florin pa luna. Nan ta warda pa ta laat pa bay yora na homber su caha. E kier bay keda na cas di hende grandi pa haya cuido, pasobra Seroe Colorado no ta tuma su persona. Tur dia nan ta trece cuminda pa e por haya.
Hendenan di iglesia tur diasabra ta traha na Rancho y aki nan conoce un ruman di Sigfried y Emiliano Kelly. E ruman a acerca nan pa papia over di Sigfried Kelly, kende tabata den hospital y despues a bay biba den e cas cu no tin coriente ni awa. Desde e dia cu nan a bin yuda na e cas, ta haciendo esaki pero mester un luga pa Sigfried Kelly rehabilita. Na Aruba tin hopi situacion asina aki y sin cu hende ta yuda. E rumannan Kelly no tin niun caminda di bay y ningun instancia ta yudando nan. E cas ta deplorabel, unda no tin awa ni coriente. Emiliano Kelly ta biba cu 450 florin, mientras cu Sigfried Kelly ta biba cu 0 florin. Dicon e departamentonan, esunnan cu ta papia di un suma di 17 miyon poni pa crisis plan social y ainda no a yega na e cas aki.
