Aruba Lions Club recientemente a forma un banda musical cu ta toca musica varia y tipico. E debut di e banda a tuma luga diasabra ultimo, 16 di maart na Huize Maristella y tambe diadomingo dia 17 di maart na Paviljoen.
E projecto aki a ser organisa den cuadro di e celebracion di nos himno y bandera. E grandinan, e staf y e personal a ricibi e banda cu braza nan habri y tur presente a goza un mundo. Lions Club a percura pa algo di bebe y di come y miembro nan di Lions a percura pa tur hende haña.
Ta e intencion di Aruba Lions Club pa continua cu e tipo di projecto asina pa nos grandinan, pasobra ta un goso pa mira e caranan alegre di e grandinan cu algun di nan te hasta a toca, canta y baila riba e dushi tono nan di Lions su banda tipico. Aruba Lions Club kier mediante di esaki gradici e centro nan Paviljoen y Maristella, e sponsor nan y tur miembro Lion cu a tuma parti na e projecto fabuloso aki.
