Ronella Tjin Asjoe (ATA): Pa recuperacion turistico nanishi di tur hende mester ta den mesun direccion

830

Directora di Aruba Toursm Authority Ronella Tjin Asjoe a splica cu e tin comprension pa tur partido, relaciona cu e demostracion di trahadonan di sector di “Food & Beverage” den fin di siman. .

E demostracion aki a bini despues cu autoridadnan local a tuma e decision pa pone e Toque De Queda cuminsa mas tempran, esta 10’or en bes di 12’or. Pa e comerciantenan di F&B esaki ta un sla pa motibo tin cu cuminsa cera nan portanan net ora cu clientenan ta den pleno comemento.

ATA ta forma parti di cluster 8 di e crisisteam y a bisa cu nan tin hopi dialogo cu Food & Beverage Association y e aspecto comercial ta un tema cu nan ta atende cu ne, ya cu e tin su representacion den Cluster 8. “Nos tin comprension pa ambos banda y esey ta hacie un poco dificil. Mester realisa cu aworaki tin diferente medida, pero si no baha e cantidad di casonan, e impacto economico lo ta mas grandi.

Kisas e medidanan ta refleha cu aworaki mester tuma extra pasonan, p’asina stop e expansion di e infeccion. Nos tin comprension pa esaki. Pero tambe tin comprension pa e situacion cu e comerciantenan ta pasando aden. Semper e ta hopi dificil pa tin e balansa. Nos a enfoca hopi pa informa e turista debidamente. No tabatin shutdown den area di hotelnan high rise. Tabatin varios restaurant habri. A sigura cu riba rednan social tur hende ta debidamente informa.”

Ronella Tjin Asjoe (ATA): Pa recuperacion turistico nanishi di tur hende mester ta den mesun direccion

Ronella Tjin Asjoe (ATA): Pa recuperacion turistico nanishi di tur hende mester ta den mesun direccionClick link pa mas: https://24ora.news/2FXlVqr

Posted by 24ora on Tuesday, September 22, 2020

El a tuma nota tambe di un reunion cu representantenan di e sector cu Minister di Finanza unda a bini un proposicion riba mesa y esaki ta den evaluacion door di e crisisteam. ATA tambe ta participa den e plataforma aki y lo ta presente ora cu discuti e tema menciona.

E ta consciente tambe cu hopi compania lo no sobrevivi e crisis aki. Un alivio ta ora cu ayera por a cuminsa registra atrobe pa subsidio di salario. “Esaki ta un ehempel clave di e apoyo y mester tene esaki presente. No tum’e como algo automatico. E ta nifica cu si mester ahusta bo modelo di haci negoshi, tin otro opcion pa e siguiente lunanan cu sigur lo ta dificil. Nos tur mester tin nos nanishi den mesun direccion pa logra e recuperacion turistico.

E tin cu bin di turismo y no ta beneficia ningun di nos si nos mira algun cu ta participa den sector comercial ta indica na turistanan pa boycott un hotel of restaurant.  Ban realisa cu e cosnan ey nota beneficio ni abo ni ningun otro hende,  ni pais  Aruba.” Na final el a recorda cu e recuperacion ta bay ta uno lento y gradual.