Parlamentarionan na mesa cu Aeropuerto: No ta momento pa kita hende fo’i trabao

763

E comision fiho cu ta atende cu companianan estatal di nos pais a tene un reunion cu gerencia di Aruba Airport Authority N.V. (AAA) encuanto e retiro obligatorio di trahadonan. Parlamentario Edgard Vrolijk a splica cu nan tabatin un bon reunion cu e director, caminda cu a trece nan argumentonan p’adilanti. Un di e peticionnan ta tempo, pa wak con ta atende cu e asunto aki. Tabata un combersacion largo. 

Presente na e reunion aki tabata Edgard Vrolijk mes, como tambe parlamentario Endy Croes y presidente di Parlamento Ady Thijsen. Tabatin parlamentario di otro fraccion tambe cu ta den e comision, pero a bandona e reunion mesora despues. Vrolijk a splica cu AAA tin problemanan financiero, pero pueblo completo ta pasando den duro y a yega un momento cu tin cu para un rato.

E situacion mes

AAA a anuncia na su trahadonan cu ta ofrece nan un pakete. Prome nan a mustr’e como algo atractivo, pero despues a bisa cu si no tum’e boluntario, nan lo bay obligatorio. Riba esaki Edgard Vrolijk a confirma cu a elabora riba e forma aki cu e director di Aeropuerto. E trahadonan pronto lo tende di esey. Sigur e minister corespondiente tambe lo tin cu trece esaki p’adilanti. Por ultimo Vrolijk a splica cu esaki no ta momento pa kita hende fo’i trabao, sino wanta hende mas tanto posibel. Pesey a bin cu e loonsubsidie regeling pa por yuda na AAA tambe.

Otro aña tin cu wak kico lo pasa. No por premira kico lo bay pasa den e pais y tin cu observa con e desaroyo lo bay y a base di esaki por trece cambio. Tin cu duna awo un tiki trankilidad na comunidad pa por cera e aña aki mirando cu e tabata hopi dificil y wak kico 2021 ta bin cun’e. Pesey a pidi mas tempo pa wak kico por haci. Gobierno como accionista di AAA tin cu wak kico por haci otro aña tambe.

Como ex sindicalista y presidente di Parlamento, Ady Thijsen a splica cu e ta compronde pa AAA y nan ta wak’e door di Covid-19 y cu e situacion ta duna pa nan haci cierto decisionnan. Sinembargo e ta kere cu mester evalua tur cos prome cu tuma un decision. Den e situacion cu nos ta awor aki, kier pa tur hende mantene nan trabao. E ora tin cu tuma un decision y tin cu evalua tur cos. Covid-19 ta algo cu nunca nos no a pasa aden.

Parlamento interesa den retironan na airport: A reuni cu gerencia di AAA

Posted by 24ora on Tuesday, September 22, 2020

Pero Thijsen a maak’e mee como abogado e tempo ey di sindicatonan cu a bin cierto decisionnan cu a haci pa kita cierto beneficionan den reorganisacion. Den e caso aki ta bon pa sinta cu e sindicatonan y purba di yega na acuerdo cu nan. Esnan cu nan kier duna un pakete mester ta un compensacion bon pa e hende. Tin cu corda cu e no lo tin trabao mas. Ta papia aki di un bon pakete, si un hende kier tum’e, acept’e, pero mester percura pa un bon pakete.

Si e trahadonan dicidi cu nan no kier bay, ta nan derecho. Mester tene cuenta cu esaki y un compania grandi manera AAA, cu ta un compania di estado, mester tene cuenta cu e trahadonan den esaki. Si tin hende cu ta wordo representa pa sindicato, nan tambe tin nan derecho cu ta papia cu nan y purba di yega hunto den acuerdo cu ta bon pa tur dos banda. No purba di bin cu retiro obliga den e caso aki. Segun Thijsen, a papia bon cu e staff. Ta kere cu nan ta tuma e asunto aki hopi na serio y tambe cu e decisionnan cu nan tuma ta bon. Parlamento lo keda monitorea esaki di cerca, como tambe tur loke ta pasando na Aruba.

Parlamentario Endy Croes a splica di su banda cu e reunion tabata uno cera, pues no por bisa tur cos cu a papia den e reunion. A scucha banda di AAA y tambe di e empleadonan. Tin 27 hende a acepta un pakete y riba lista tin x cantidad cu nan a ofrece un pakete.

Croes a splica cu Gobierno tin un maneho di duna sosten na negoshinan mediante di loonsubsidie di cual aeropuerto tambe ta cay bao di dje. Di e manera kier a papia den liñanan grandi. E timing ta hopi importante. Ta compronde e situacion financiero di cualkier compania grandi, tambe di AAA. Sinembargo e mensahe a yega na mesa, segun Croes, sin bay mas den detaye. Lo keda pending pa un reunion dentro di dos siman. A laga atras cu lo sigui e desaroyo aki di cerca, teniendo e ser humano central, vooral den un crisis yegando fin di aña.

No solamente Gobierno pero tambe companianan estatal y tambe tur otro companianan priva, tanten cu nan por, gobierno ta dunando loonsubsidie. Ta hustamente pa mantene e trahadonan cu e speransa cu trabao. Nos ta bay pasa den duro prome cu nos sali afo. Conociendo Aruba, conociendo e boluntad di henter e pueblo aki, sa cu lo para banda di otro pa hunto sali for di e crisis aki.