Cuerpo Policial Aruba, riba instuccion di Ministerio Publico y cu permiso di Hues Comisario a tene un accion di Ristramento preventivo na varios area specifico, conoci como areanan di riesgo. Den e cuadro aki ta para autonan pa control y por yega y ristra ciudadanonan riba areanan publico.
Den cuadro di ley, Ministerio Publico mester pidi permiso di Hues Comisario pa tene e asina yama “Preventief fouilleren”. E metodo aki ta duna Polisnan e autoridad pa, sin cu tin un sospechoso contra e persona, por acerk’e y control’e na su curpa buscando pa arma y/of municion. Husticia ta haci uzo di articulo 12 inciso 2, 13 inciso 2 y 14 incuso 2 di Ley di Arma di Candela (Vuurwapenverordening). Den pasado por a haci e tipo di control asina solamente na Aeropuerto.
Diasabra anochi e accion a cuminsa for di 6:00pm pa awe diadomingo 6:00am. E zonanan asigna pa e accion preventivo tabata:
- For di Ritz Carlton sigui pa e rotonde di Marriot bay Bakval te na T-splitsing, bay links te na Caya Frans Figaroa, bay rechts te cu Yen Yen bar & Restaurant. Patras di e dicho restaurant aki te cu Turibana 41. Sigui links riba e Caya Frans Figaroa te cu crusada di luz di trafico na altura di Misa di Santa Anna na Noord. Despues ta bay rechts ariba e caminda di asfalt di Palm Beach te cu Wendy’s despues ta bay links direccion na ex- House of Chens. Aki ta bira bay rechts direccion Olde Molen esaki ta inclui otro banda di caminda di Olde Molen te Bubaliplas. Ta sigui bay links direccion Costa Linda. Pa despues bira rechts pa e direccion di sistema di awa na Ritz Carlton.
- Ta cuminsa for di luz trafico di “Guardian Group” ariba L.G. Smith Blvd direccion casnan di pueblo Bushiri. Despues sigui pa e casnan di pueblo di Madiki Kavel caminda nobo di Watty Vos Blvd. te cu Cuquisastraat 17. Despues di aki ta sigui stret caminda principal di Caya Ernesto Petronia direccion Oranjestad. bay rechts pa rotonde di Ponton. Sigui pa links bay direccion crusada di Kamerlingh Onnestraat na altura di Stadion di R.C.A. Desde e crusada aki bay te cu rotonde Sero Blanco. Ariba e ringweg aki te cu rotonde di ex- Mio den Caya Betico Croes. Cambia bay links ariba Caya Betico Croes direccion Tarabana. Ta sigui stret direccion di ex- Codemsa. Ta cambia bay rechts ariba e Watty Vos Blvd. direccion rotonde di F.C.C.A. Aki ta sigui stret pa rotonde di Airport. Cambia bay recths sigui stret bay abou te cu rotonde Las Americas. Aki ta haci un cambio bay links direccion Nikky Beach. Y for di aki e linea ta core stret bay te cu crusada di luz di trafico na “Guardian Group” ariba L.G. Smith. Blvd.
- Sero Patrishi 231 rond di e zona aki ta cu 250 meter na unda tin control di accion preventivo.
- Cas Casuela na Tanki Leendert, rond di e zona aki tin 75 meter na unda tin control di accion preventivo.
- Tinashi Music & Sports na Paradera, rond di e zona aki tin 150 meter na unda tin control di accion preventivo.
