Diasabra anochi lat, alrededor di 11:00pm, relaciona cu e anuncio di controlnan preventivo na varios area strategico di nos isla, Polis a yega y revisa tur hende sinta dilanti Budweiser Bar den Madiki. A topa cu dos hende homber stranhero cu no por a prueba nan status legal di estadia riba nos isla, p cual a detene nan y hiba nan pa Warda nos Costa pa procesa nan deportacion inmediato.
Manera ta conoci, den cuadro di ley, Ministerio Publico mester pidi permiso di Hues Comisario pa tene e asina yama “Preventief fouilleren”. E metodo aki ta duna Polisnan e autoridad pa, sin cu tin un sospechoso contra e persona, por acerk’e y control’e na su curpa buscando pa arma y/of municion. Husticia ta haci uzo di articulo 12 inciso 2, 13 inciso 2 y 14 incuso 2 di Ley di Arma di Candela (Vuurwapenverordening). Den pasado por a haci e tipo di control asina solamente na Aeropuerto.
Mester menciona cu den pasado, despues cu a introduci cambio den e leynan di Landsverordening Toelating en Uitzetting (LTU), a haci imposibel pa Polis controla un stranhero den area publico pa su documentonan di estadia. A pasa e autoridad ey pa Warda nos Costa so. Despues di hopi presion di oposicion, Minister di Husticia mr. Andin Bikker a opta pa cambia e maneho y desde 1 di juli 2018 a haci cu Polis tambe por controla stranheronan pa nan status di estadia of permiso di trabou valido pa por traha riba nos isla. Desde e cambio ta nota cu ta garando mas stranhero, specialmente durante control di trafico y ora di ristramento preventivo.
