Den un LIVE directamente for di e facilidad di e refineria di Aruba, 24ora a duna informacion na pueblo di kico a pasa awe den oranan di mainta ora cu un truck a explota. Esaki a sosode riba e tereno.
For di e sitio tabata presente Patrick Paskel, kende a conta poco historia di e refineria y despues a splica kico a pasa. E explosion aki a bini na momento cu Minister encarga cu Asuntonan di Energia, Glenbert Croes, ta den combersacion riba futuro di e area aki.
E explosion a sosode cu un boter di gas di 55 galon cu tin hopi aña. No sa kico tabatin den e boter pa cual a contrata un compania priva pa habri e boter y despues deshaci di dje. Den e proceso aki a resulta cu e boter a causa efecto di explosion cu a sigui pa e truck cu un tanki riba dje y eynan ta caminda e explosion a sosode.
Tur autoridad concerni a yega na e sitio, entre otro director di Departamento di Calamidad Rino Hermans, cual departamento a tuma e caso over.
Eynan por a nota yegada di diferente autoridad y ambulancenan cu a transporta dos herido pa hospital, di cual uno tabata mustra hopi grave.
Ricky Lacle, director adhunto di Refineria di Aruba (RdA) na salida di e refineria a duna di conoce cu e vacuum truck di un contratista a explota y cu, segun nan a informe, tin tres persona herida. E explosion, el a sigui splica, no a causa daño na ningun otro structura mas di FMSA (Fuel Marketing & Supply Aruba).
Lacle a confirma cu momento cu e echo a tuma luga e tabata den reunion cu minister Glenbert Croes y despues di a acumula informacion den e refineria, a dicidi bay hospital pa pone su mes na altura na situacion di e heridonan.
A evacua tur hende for di e sitio por si acaso e situacion por ripiti, aunke cu e director adhunto di RdA a bisa cu no ta existi ningun peligro mas.