Minister encarga cu Asuntonan di Energia Glenbert Croes tabata den un reunion na Refineria di Aruba (RdA) ora cu e explosion a tuma luga riba tereno di e refineria. E mandatario a splica cu e reunion cu RdA tabata hustamente pa planifica kico ta bay haci den 2024.
Minister Croes a splica cu e ta den contacto cu tur e instancianan cu ta atende cu e explosion y continuamente nan ta inform’e di tur desaroyo. Hasta e team di RdA ta moviendo pa mira con nan por yuda.
Naturalmente, aunke tin indicacion preliminar, mester bini un investigacion a fondo. Pero mas cu tur cos, con pa evita cu algo asina por sosode atrobe. E momento ey, prioridad tabata pa atende e heridonan y despues e investigacion.
E mes a pidi e director di RdA pa bay na e sitio pa pone su mes na altura y mira tambe e situacion di e heridonan.
Minister Croes ta bisa cu tin hopi material cu tin añanan largo wanta eynan y mester analisa con pa atende cu tur esaki na momento cu mester move algo. Importante ta pa ki paso pa tuma pa evita e situacion ripiti.
E sucedido, e mandatario a bisa, ta mustra cu mester pensa lihe con pa bay uza e facilidad aki den futuro.
