E walkout di miembronan di Cuerpo di Duana ta conta cu comprension di e director Ricky Croes. E mes a sali pafo pa splica e situacion. Por bisa cu el a para banda di e trahadonan y nan sindicato SADA. Y a bisa cu mester di un luga nobo pa Cuerpo di Duana.
E ta bisa cu un parti di e edificio ta hopi calor y e otro banda hopi friu. A cambia airco dos biaha pero e compressornan a daña. E doño ta haci di su banda, pero airconan ta sigui daña. Pero tambe tin problema cu e wcnan y mester a manda hende cas, door di esey of debi cu nan ta sufri di presion halto y no por traha den calor.
E mes a manda carta diferente biaha pa minister pa busca un solucion. A sali di e edificio bieu pasobra e no ta apto pa traha den dje y a busca un edificio temporal. E no tabata e miho, pero den e situacion tabata esun mas adecuado pa ta temporalmente, esta tres aña. Y te ainda no a logra nada nobo.
E situacion sigur no ta adecuado pa traha den dje. “Mi ta biba cu e miembronan di SADA cu e situacion aki no ta e miho cu tin. E solucion mas facil ta pa busca un luga adecuado, mientras cu ta en espera di nan edificio nobo.”
Pa mas cu 20 aña a papia di un edificio nobo. Tin un luz na caminda, el a bisa, mirando cu Bohama ta trahando riba e diseñonan. Ta spera cu pronto tin un contesta concreto pa un edificio pa Duana y cu ta haci cu e miembronan di e cuerpo por traha cu trankilidad. “Si nos tin bista cu tin algo nobo na caminda, nos por tin pasenshi.”
