Tin tres parlamentario cu a bay participa den e reunionnan di IPKO na Hulanda actualmente a keda den un solo camber di hotel, mirando cu sa cu cada un di nan ta haya un ‘vergoeding’ pa bay representa Aruba. Awo supuestamente tin un sistema cu tin cu sigui ora cu haci uzo di cierto ‘vergoeding’, sea ta pa estadia, cuminda, etc.
Prome Minister, mr. Evelyn Wever-Croes, a contesta e pregunta aki cu un otro pregunta: “a wak e parlamentarionan aki drumi hunto den un camber?” ta loke el a puntra.
E mandatario a indica cu e no ta bay riba redo. Parlamento tin su reglanan, el a indica. Gobierno ta gobierno y Parlamento ta parlamento. Parlamento su reglanan di daggeldvergoeding y ta nan ta autonomo den esey y ta trahando pa haya mas autonomia ya cu un gobierno no por influencia parlamento.
Ta algo cu parlamento tin di contesta esaki. Pa gobierno t’asina cu ora biaha ta haya un suma p’e pasashi, si ta gobierno ta manda e persona p’e biahe, e ta paga e pasashi. E ta paga tambe e gastonan di estadia te na cierto suma. Tambe e ta paga un tipo di perdium, caminda cu por haya algo pa por come cu ne. Esey t’e gastonan cu tin.
Pa por haya nan, mester mustra cu e pasashi ta reserva, e ora gobierno ta paga esaki y ora tin hotel reserva y mustra cuanto e costa, ta haya e placa ey e ora.
Teoreticamente si den gobierno, un departamento cu ta bay un dienstreis, dos hende dicidi di comparti camber, e ora ey ta loke nan presenta na recibo lo ta cubri. Asina ta trata den gobierno.
Parlamento tin su reglanan. Nan tin un Commissie Huishoudelijke Aangelegenheden, cual prome minister a forma parti di dje. E tempo ey tabata den oposicion y tabatin hopi problema con cierto parlamentario di AVP tabata trata cu e placa ey. Nan tabata haya placa pa bay un caminda y nan no ta bay. Ta haya placa pa cinco dia, reunion ta un dia, etc.
