Aruba a sali cu un delegacion di pesas pa participa na e Campeonato Panamericano Juvenil Sub-17 di hisamento di peso cu a tuma lugar den e ciudad di Guayaquil, Ecuador for di 23 pa 30 augustus 2019.
E delegacion ta consisti di e atletanan Nicole Dijkhoff den categoria di 71kg, Laertes Araque Jr den categoria 89kg y Jeremy Dijkhoff den categoria di 81kg. Como entrenador internacional bai Walter Llerena di Ecuador.
Prome cu a atletanan a bai participa na e campeonato aki a bai un campo di entrenamento na e ciudad di Puyo na Pastaza pa train hunto cu e atletanan di Ecuador y bow guia di Walter Llerena. E campo di entrenamento tabata di 2 pa 25 augustus unda e atletanan a train duro y tambe a siña hopi. Pa dia 26 augustus e seleccion a wordo transporta pa e ciudad di Guayaquil pa participa den e campeonato Panamericano Sub-17 di pesas
Prome atleta cu a subi plataforma ta nos atleta femenino Nicole Dijkhoff cu tabata tin 6 atleta den su categoria 71kg a logra den su hisadanan den snatch 71kg, clean & jerk 80kg pa logra un total di 151kg ta termina na di 6 lugar. Den snatch Nicole ta kibra record di Aruba den juvenil cu 3kg. Ganador den e categoria aki a resulta atleta di Mexico Emmy Velasquez medaya di Oro cu un total di 207kg, medaya di Plata a bai pa Kelin Jimenez di Ecuador cu un total di 203kg y medaya di Brons a bai pa Maria Rodriquez di Venezuela cu un total di 188kg.
Tambe otro atleta cu nos por a wak den accion ta Jeremy Dijkhoff di apenas 15 aña hasi su debut pa di dos biaha riba plata forma internacional den e Campeonato Panamericano Juvenil por a midi forsa cu un cantidad di 7 atleta di various paisnan manera Brasil, Colombia, Ecuador , Estados Unidos y Venezuela. Jeremy Dijkhoff ta logra keda na di 6 lugar den categoria di 81kg den e campeonato unda a logra den snatch 80kg y a Clean & Jerk 105 Kg pa un total di 200Kg. Ganador den e categoria medaya di Oro a bai pa Dade Stanley di Estados Unidos, Medaya di Plata a bai pa Kayleb Quintero di Merca cu 257kg total y Medaya di Brons a bai pa Daniel Lopez di Colombia cu 252kg
Por ultimo nos ta hanja e atleta hoben Laertes Araque cu a hasi su debut pa di dos biaha den youth Sub-17 riba e Campeonato Panamericano juvenil tabata tin un cantidad di 6 atleta di various paisnan manera Chile, Colombia, Ecuador, Estados Unidos y Peru. Laertes Araque den categoria di 89kg ta logra den su hisadanan den snatch 100kg, clean jerk 125kg pa un total di 225kg cu esaki Laertes ta termina na di 6 lugar. Den snatch ta logra kibra record di Aruba den juvenil cu 5kg y den total. Ganador den e categoria aki a resulta Amel Atenia di Peru cu un total di 284kg, medaya di Plata a bai pa Nicolas Cueva di Chile cu un total di 180kg y medaya di Brons a bai pa Lander Wells di Estados Unidos cu un total di 272kg.
Aruba Amateur weightlifting Association kier a manda palabra di gradicimento na Stichting Sportsubsidie Aruba y Lotto pa Deporte cu a cubri e gastonan di e Campeonato Panamericano Juvenil Sub-17 de Levantamiento de Pesas y palabra di pabien na nos atletanan pa nan debut internacional cu ta Jeremy, Nicole, Laertes y entrenador Walter Llerena.
