Fatima Orman ta bibando casi 29 aña den su cas cual el a cumpra for di FCCA. El a pag’e cash. Prome cu esey el a paga e huurkoop sin faya nunca. Nunca el a falta FCCA un luna di huur. E tabata cobra antes bijstand y manera e cobra, e ta bay paga su cas, awa y coriente. Te dia cu el a bisa cu awo ta basta.
Tres aña pasa Fatima a dicidi cu e ta cumpra e cas den huurkoop, pero e calvario cu e ta pasando aden ta algo cu nunca el a spera. E suma cu e mester a paga tabata 29 mil florin, kitando loke el a paga caba ta keda un suma di casi 23 mil florin, cual el a paga cash. Tabata falta solamente tres pago cu el a caba di paga eseynan den tres luna prome cu final di 2016.
Prome cu el a paga, segun Orman, el a bisa nan cu e kier su papel di compra pa bay Notario. FCCA a laga sa cu e ta haya e papel aki. Akinan su odisea a cuminsa cu te awe e no a haya ningun documento pa bay Notario. “Mi ta pasando den un caminda di cruz.” Tur hende cu a cumpra cas y a caba di paga esaki, despues di dje, si a haya nan papel di notario y e cu tin tres aña cu a cumpra su cas, no a haya su papel.
Fatima a cuminsa busca drechi tur caminda y for di paden di gobierno el a haya sa cu e papel t’ey, pero e ta wanta y tur cos tin di haber cu politica. Tempo mi a cumpra e cas, mi no a haya e cas via politica. El a cana masha hopi aña pa e por a haya su cas. El a hasta manda un e-mail pa Ady Thijsen, pero e no a ricibi reaccion.
A bisa Fatima pa e bay check. Minister Otmar Oduber a laga wanta tur papel, segun Fatima, y e no sa pakico. E ta bisa: “Otmar no a dunami placa pa cumpra mi cas. Ainda mi ta pagando banco.” Segun el a sigui conta, ta hala di biaha el a acudi na FCCA enbusca di su derecho y hasta ta kere cu nan ta casi pa yama Polis p’e caba. Cada biaha cu e bay FCCA e ta haya como contesta cu e ta reclama mucho y cu e ta pura pa haya su papel, comparando cu otro hendenan cu ta wardando pa mas di 10 aña. “Tur loke mi kier ta un prueba den mi man cu e cas ta dimi.”
Nunca FCCA ta haci algo na e casnan. Ora cu el a drenta e cas mas cu 28 aña pasa, e vloer a daña. El a bay FCCA y a keda riba nan pa casi 10 aña y nunca nan a bin drecha su vloer. Bentana tambe el a bay pa FCCA y ainda e barco ta riba lama cu e bentananan, pasobra te ainda nan no a drecha nan.
Unico cos cu nan a pone p’e ta e plafond, door cu su yiu tabata bay haya baby, y e plafond a sak. E tempo ey esey tabata e unico cos cu nan a bin drecha riba e cas.
Dicon tin cu wanta tur e cosnan aki. Ora di tuma placa si nan ta tuma. Fatima ta haya cu esaki ta un ladronicia. Nunca el a debe FCCA 10 placa, cu nan mester bis’e cu e debe huur. E tin tur prueba cu e tabata paga na ora y e ta bay hiba FCCA Kortgeding. E ta bay corte cu nan. Fatima a bay den tur clase di manera bon cu nan pa e por haya su papelnan, pero no tin otro manera. E mester a tuma medidanan drastico pa asina e por haya su papelnan. Si ta guera FCCA kier, e ta bay haya guera y e ta butanan paga tur e añanan cu e tin ta warda riba nan. Esey ta loke cu Fatima kier. E no ta worry cu placa, mientras cu dun’e su papel, cos a caba. E ta bay su notario, traha su papel y cos a caba. “Si mi mester drenta fierna y saca diablo na su cachonan, mi lo hacie. Pero mi kier mi papelnan. Pakico tanto problema,” e ta puntra.
