Pa e lider di partido RAIZ un publicacion di e partido riba nan Facebook no tin nada di controversia ni ta algo cu por causa problema cu nan partner den e coalicion existente.
“Nos ta para pa proteccion di naturalesa,” el a comenta. Siman pasa a sali publica riba nan Facebook un comentario di e partido encuanto exploracion di petroli y gas. Esaki a bini den cuadro di e derame cu tabatin na Trinidad & Tobago y cu a causa daño hopi grandi. Den e publicacion ta para cu ta miho pa no bay den e direccion ey y busca proyectonan mas sostenibel.
“Pa loke ta plataforma RAIZ desde inicio nos a para y ta parti di nos principio pa lucha pa proteccion di naturalesa ….” E ta sinti cu rond di e publicacion aki a simplemente crea un controversia pa crea incertidumbre cu tin problema den coalicion riba e tema aki. ”E partido, el a enfatisa ta keda para pa proteccion di naturalesa y ta kere den uza energia sostenibel en bes di sigui uza fossils fuel pa crea energia.No mester lubida, el a bisa, cu nan ta forma parti di un coalicion unda cu mayoria ta dicidi.
“Ora cu ta trata decisionnan cu mester tuma, nos ta respeta decision di mayoria. Pero nos plataforma ta kere cu den cuadro di e cambionan climatico, e efectonan, nos vision ta pa bay den direccion di energia alternativa manera solar panel, turbina di biento y otro alternativanan cu por uza.”RAIZ a compronde cu e tecnologia cu ta bay uza pa bora pa gas ta cuadra pa proteccion di naturalesa y ainda mester haci e estudio di impacto ambiental ainda. Despues di esey “nos por duna mas comentario” riba e tema aki. Pues ora cu haya tur e documentonan, lo mira si ta anda di un forma cu ta protege naturalesa.Na final e mandatario a bisa cu toch lo ta bon pa sondea e posibilidadnan si tin gas, pero e metodonan mester cuadra cu aspecto di naturalesa y evita cu e ta wordo negativamente impacta.
MINISTER WEVER A acerca minister Wever tambe riba e tema aki, despues cu siman pasa na su yegada e no por a bay den detaye pa motibo di no tabata na altura di e publicacion. E tema di exploracion di petroli / gas ta algo cu minister Glenbert Croes a trece dilanti den Conseho di Minister y el a haya aprobacion pa bay tras di e posibilidad aki. “Pa cuminsa papia, sondea y explora y e ta actuando den cuadro di e mandato cu e tin di Conseho di Minister.” Esaki ta nifica cu Croes ta canando e trayecto corecto, minister Wever a splica.Na momento cu tin avance lo sigui delibera “y dicidi hunto cual ta e direccion cu nos ta bay. Pero te awo e ta canando manera ley ta stipula.”
