Den un rueda di prensa cu a tuma luga awe mainta na cas di partido AVP, oposicion, representa pa algun miembro di AVP, a trece algun preocupacion relaciona cu e medidanan cu gobierno ta bay introduci pa dilanti. Asina lider di e fraccion di AVP, mr. Mike Eman a splica cu recientemente nan a ricibi tres carta cu lo tin consecuencia grave pa nos comunidad y pa esaki a sinti cu ta importante pa comparti e informacion aki.
E prome carta ta procedente di hospital y den dicho carta nan a anuncia cu tur e medianan tuma pa gobierno mediante AZV ta bay tin consecuencia dramatico pa servicio medico cu hospital ta provee como tambe p’e trahadonan di hospital como tambe e pueblo di Aruba den su totalidad.
Asina Eman a sigui p’e di dos carta, esta procedente di SKOA, den cual a splica e situacion di con gabinete Wever-Croes a stop di paga e werksternan y e consecuencianan financiero dificil cu esaki a trece cu ne y cu abase di algun calculacion nan lo mester bay aumenta e schoolgeld pronto. E di tres carta, manda di WEB pa ELMAR, den cual WEB a anuncia cu entrante april binidero lo bin un aumento di tarifa di entre 30 pa 40%.
Tur esakinan ta presenta situacion sumamente preocupante y ta cuestiona maneho di gobierno den tur esaki. Asina Eman a expresa cu “E gobierno aki su cabes ta na Carnaval, su cabes ta na beneficio, privilegio…nan no tin mas forma pa crea mas beneficio pa nan mes y nan amigonan pa enrikese tur hende rond di nan, pero e ciudadano cu mester haya su cuido…no ta conta pa e gobierno aki”.
Pa un relato mas amplio lesa edicion di TREMPAN.
