Awe mainta sindicato ABV (Arubaanse Bond van werknemers in Verplegende Instellingen) a tene un reunion general pa su miembronan pa asina dialoga riba e recorte di salario. Den un rueda di prensa cu a tuma luga despues di esaki, presidente di sindicato ABV, Gina Maduro, a splica cu ta sector di cuido tabata e prome pa entrega na maart 2020 ora cu a anuncia e pandemia di COVID-19. Ta trata aki di un entrega di 5.5%, pues no ta solamente e 12.6% di e trahadonan publico. Maduro a bisa cu sector di cuido a haya un recorte brutal total di 60 miyon pa aña, esta 5 miyon pa luna pa tur instancia di cuido cu ta haya lumpsum (ImSan, HOH, Respaldo).
Asina Maduro a sigui splica cu ta den pleno pandemia a bin cu e decision aki y cu te dia di awe, nan no sa ta con a yega na e suma aki. “Un locura total, mi tin cu bisa esey, paso no ta normal cu den pleno pandemia net den zorg bo ta bay corta asina brutal”. ABV a cera cabes hunto cu e sector di cuido completo y no a para keto mandando nan cartanan di protesta, pa gobierno, pa parlamento, pa gobernador y hasta pa Hulanda. Pues, un y tur den e sector aki a vocifera e efecto di esaki y e consecuencianan cu e recorte aki tin riba cuido mes.
Lamentablemente, Maduro a bisa, cu e recorte aki a permanece na vigor y ta solamente na maart y april aña pasa a baha e 5.5% na 2.2% cu sector di cuido por a hala un rosea, pero despues a bolbe implementa e mesun 5.5%. Asina tambe, tres siman pasa henter e sector di cuido a ricibi un carta den cual ta para cu e recorte aki lo keda den 2022 y tambe pa cinco aña mas, corespondiente na e landspakket. Consecuencia pa esaki ta bay ta drastico y lo trece mas reto pa tur e instancianan di cuido y HOH ta esun cu mas lo sufri, segun Maduro.
Basa riba tur esaki HOH a dicidi pa pone trabou abou pa un ora largo, esta di 9:15 pa 10:15 y lo atende solamente e casonan di emergencia.
Pa un relato mas amplio lesa edicion di TREMPAN.
