Den fin di siman a tuma luga un evento grandi na Maassilo na Rotterdam, Hulanda. Un fiesta cu un concepto completamente diferente. Tabata un combinacion di diferente promotornan hunto den un solo evento. For di e promotor local, Rondel Heyliger caminda ta conoci pa e Soca vs Dancehall p’esunnan di Lechi Kondens y Melonade.
E fiesta a conta cu un line up varia, for di Cache Royale, 2SYNC, Tribal Kush, Tito Rasz y mucho mas. Director di Headlines Group, kende t’e cas editorial di 24ora.com y TREMPAN a combersa cu e promotor local, Rondel Heyliger a conta cu e concepto a cuminsa for di aña pasa. Ya tabatin fiesta hunto caminda a combina e publico di Aruba, Corsou y St. Maarten den un solo evento. Awo a dicidi di agrega un promotor mas caminda e trio a sa di yena Maassilo na Rotterdam por completo.
A mira bandera di diferente pais, for di Aruba, Corsou, Boneiro, Hulanda, St. Maarten, Saba y hasta St. Eustatius. E evento tabata parti den tres parti, claro cu tres sala separa, cada un cu nan propio genero. E evento a conta cu diescuater artista riba e scenarionan. Rondel tin binticuater aña den e industria di entretenimento.
Tur cos a cuminsa tempo e tabata studiante, door di organisa fiesta pa e studiantenan Arubiano residencia na Hulanda. E animo a keda y a sigui den e industria aki. Un di e motibonan cu e ta keda den e negoshi aki ta ora Rondel mira e musica di e islanan ta creciendo pocopoco na Hulanda.
Rondel ta biba na Aruba pero henter su ekipo ta traha na Hulanda. E ta un sentimento unico pa biba na Aruba y biaha pa Hulanda ora tin algun di su eventonan. For di cas ta haci tur e trabounan di preparacion y como tres bes pa aña ta bula pa tera friu.
