En bista di articulonan publica recientemente cu ta sugeri cu Stimami Sterilisami no a extende un invitacion na tur clinica veterinario pa participa den su programa nacional di sterilisacion di 2024, e organisacion kier e clarifica cu esaki no ta corecto. E fundacion a extende un invitacion na tur veterinario na Aruba na fin di december 2023 pa participa den nan programa di 2024.
Adicionalmente, pa sigura cu e costo di sterilisacion keda accesibel y economico pa publico general y organisacionnan di rescate, Stimami Sterilisami a rekeri pa veterinarionan cu ta forma parti di e programa mantene e prijsnan estableci na comienso di 2023 y pa nan inclui e microchipnan suministra door gobierno di Aruba, completamente gratis.
E fundacion a tuma e decision aki a base di feedback cu a ricibi di comunidad, cual ya caba a expresa cu e prijsnan di sterilisacion ta halto, te hasta cu e subsidio di Stimami Sterilisami cu ta cubri te cu 45% di e costo. Esaki ta sumamente importante ya cu e feedback aki ta bin di esnan cu mas desesperadamente tin mester di e yudansa—e segmento di e poblacion cu ta hustamente clave pa haci un impacto duradero den reduccion di cantidad di cacho y pushi sin doño riba nos isla.
Adicionalmente, Stimami Sterilisami ta un organisacion sin fin lucrativo cu ta depende totalmente riba e generosidad y donacionnan di sector publico y priva. “Nos donantenan a scoge pa inverti den bienestar di comunidad y cuido di nos bestianan, y nos tin e responsabilidad pa sigura cu e fondonan aki wordo uza den e forma mas efectivo y eficiente posibel, enfocando primordialmente riba loke ta miho pa henter comunidad di Aruba. Nos ta sumamente feliz cu VSH Veterinary Specialty Hospital a acepta e condicionnan aki y ta participando den nos programa nacional di 2024. Principalmente considerando cu na 2022 nan tawata e unico veterinario cu a participa den nos programa y toch a sterilisa casi 4000 cacho y pushi e aña ey. E aña aki e clinica tin un veterinario mas den nan team dinamico. Nos ta positivo cu e aña aki nos lo sterilisa 5000 of mas cacho y pushi.”
Ta imperativo pa menciona cu e organisacion ta gradici na cada clinica cu a participa den nan programa durante e ultimo añanan. Nan contribucionnan a yuda sterilisa mas cu 36,000 pushi y cacho desde cu a cuminsa na 2016. Nan ta reitera cu manera a informa na Januari, ta continua di extende invitacion na nan pa uni cu nos y participa den e programa di 2024, mara na e condicion cu nan ta bay di acuerdo pa mantene e prijsnan di 2023 y instala e microchipnan completamente gratis.”
Tocante Stimami Sterilisami
Fundashon Stimami Sterilisami ta un non-profit organization cu ta uza 100% di tur donacion pa ofrece subsidio pa e procedura di sterilisacion pa tanto publico en general, como tambe organisacionnan di boluntario cu ta cuida cacho y pushi. Nos organisacion su bukinan ta habri y ta wordo controla pa brinda transparencia total di e uzo di fondonan. Pa esnan cu kier aporta na e gran causa aki, por haci donacion directo na Fundashon Stimami Sterilisami:
Bank: Aruba Bank Acc. Number: 6012630190; Acc Name: FUNDASHON STIMAMI STERILISAMI; Swift code: ARUBAWAX
