MEP a crece hopi den e eleccion aki. Lider di e partido, Evelyn Wever-Croes, ta sinti su mes hopi bon. Tabata un dia duro y largo y ainda wardando e ultimo resultadonan. Tabata tin problema na tanto Maria Goretti y tambe na Ayo y tambe na Pos Chikito tabata tin problema. Pero overall hopi satisfecho, hopi contento. E trabao duro cu a wordo haci a payoff. A crece cu dos asiento. Si pone den contexto di e resultadonan, ta mira cu esey ta algo sumamente grandi. AVP a baha cu 4 asiento y a perde 1/3 parti di loke nan tabata tin. Esey ta un sla hopi duro. Tin partido RED cu a gana un asiento. Tin partido POR cu a haya un asiento acerca, pasobra PDR tin uno caba. Tin MEP cu a gana dos asiento acerca.
Segun Wever-Croes, a insisti hopi riba un nivel di campaña diferente, sin intimidacion y atake y el a pay off.
Trahamento di lista
E lista, na momento cu a trah’e, a boost henter e campaña. Pasobra tabata papia di tur tempo di solucion pa nos pais, pero tanten cu no presenta un ekipo di hende cu por logra esey, e ora bo no tin nada. Desde e momento ey a boost’e.
AVP den oposicion
No tin ningun palabracion, pero si a bisa di un principio, no lo bay goberna cu AVP, pasobra nan no ta compatibel. Pero aparte di esey semper ta laga tur opcion habri, contal cu e partido cu lo bay negosha cun’e ta comparti cu MEP e punto di bista importante cu mester tin un Gobierno integro. Tambe cu ta bay baha gasto di berdad, pasobra tin cu baha gasto di 9 pa 7 minister, pa por scapa e 70 miyon cu esey ta costa awo, pa hinca esey pa haci Aruba mas sigur, pa cuido y salud, den enseñansa, etc.
Ta keda na Mike Eman pa cuminsa cu e proceso di formacion, mirando cu e partido tin poco mas voto cu MEP. A sali toch como partido mas grandi. Aunke cu nan a bay atras den asiento, pero toch a keda e partido mas grandi.
A tuma nota tambe di su entrevista ora el a bisa cu e papel di AVP ta den oposicion y e lo retira. Cu esey ta cambia henter e scenario pero tur esaki ta Gobernador lo bay dicidi dialuna, ora cu yama e partidonan y bay cuminsa traha riba e procedura pa informador.
Kico Evelyn Wever-Croes lo bay haci
Prome cos cu e lo bay haci ta descansa un poco y dedica su mes na su famia. E lo cuminsa pensa hopi bon kico lo wordo haci. Si en caso e mester haya e papel di informador, cual e lo haya sa despues di Gobernador, lo ta un tarea sumamente grandi. Semper bo ta tene cuenta cu e posibilidad eynan. Pesey a desea di no a haya e rol aki si nan ta goberna nan so. Pero awor aki tin cu negosha un coalicion, cual lo bay tuma su tempo y tin cu wordo haci poniendo interes di Aruba na prome luga. Esey ta algo cu lo bay tuma hopi tempo y Wever-Croes tin cu tuma su tempo pa fiha un strategia y consulta cu conseheronan.
