Un poco prome cu 10’or di mainta a baha na Aeropuerto Internacional Reina Beatrix e vuelo AG902 di Aruba Airlines, procedente di Havana, Cuba. Nada straño cu excepcion di e hecho cu esun piloteando e avion ta e prome hende muhe Arubiano den e posicion aki: Marrit Gorter.
Marrit di mayornan Hulandes, a nace y crece na Aruba te ora cu el a bay sigui cu su estudionan avansa na Merca y Hulanda, cu su 21 aña pa studia pa bira piloto. Pero el a casa y sali na estado, pa cual e mester a tuma un decision. Hunto cu su ex casa a dicidi cu nan lo forma un famia y dedica na esaki, prome cu e bay bula. Asina ora cu su yiu muhe grandi tabatin 17 aña y esun chikito 14 aña, e no por a nenga mas su pasion pa bula avion.
“Awo cu mi tin 44 aña di edad mi a dicidi di cuminsa bula, siguiendo mi pasion. Mi ta hopi agradecido na Aruba Airlines cu a brindami e oportunidad aki, mi casa, famia y amigonan cu a encurasha’mi y a bisami pa simplemente sigui mi soñonan.”
E tabata dedica na su famia ora cu 4 aña pasa, e tabata na aeropuerto di Schiphol cu su dos yiunan y su bista a cay riba algo peculiar. Un tripulacion completamente di hende muhe pa subi e avion di KLM cu e mester a aborda pa New York. “Mesora mi a pensa, mi tin cu haci e cos aki. Asina e proceso a cuminsa pa mi cuminsa bula atrobe. Pues tur cos a cuminsa realmente 4 aña pasa.”
Piloto ta un mundo di hende homber, pero e ta un profesion bunita. “Ami a dicidi cu mi 40 aña pa cambia di profesion. Simplemente bo mester sigui bo soñonan.” E mundo aki no ta asina dificil. Mester studia duro y niun momento el a sinti un falta respet cerca su coleganan masculino. El a sinti cu nan tin e mesun respet pa su conocemento cu nan tin pa hende homber.
Aki na Aruba, ora el a pensa pa bira piloto, el a scoge pa A-Pakket na Colegio Arubano. Mester sa di Wiskunde, Natuurkunde y tambe Aardrijkskunde.
Den su tempo liber e ta gusta practica watersport, hunga golf cu su casa y de bes en cuando cushina.
