Awe mainta e comision fiho di Ciencia, Innovacion, Energia y Desaroyo Sostenibel (CWIEDO) den Parlamento, a ricibi representantenan di EcoGas pa un presentacion tocante nan proyecto pa recicla desperdicio municipal te na 100% sin necesidad di aumenta costo pa e consumidor. Parlamentario di e Fraccion di MEP, Daphne Lejuez, siendo Presidente di e comision, a enfatisa cu e solucion di EcoGas lo no rekeri un inversion ni aumento di prijs!
E desperdicio, despues di wordo separa na Aruba, enbes di wordo dera na Sero Teishi, awo lo por wordo exporta como RDF (refuse-derived fuel). Esey ta un producto di e desperdicio separa cu ta non-toxic y sigur, pa Colombia unda e lo keda procesa y recicla 100% y unda te hasta e “ash” cu resta lo wordo inclui den produccion di cement.
Di e forma aki ta reduci e cantidad di desperdicio y e “carbon footprint” di Aruba, plus esaki tambe lo elimina e necesidad di un dump y lo contribui na e vision di Gobierno pa un economia circular.
Otro siman Minister di Infrastructura y Medio Ambiente lo presenta tambe na e comision di Parlamento pa duna su relato encuanto e proyecto di incinerator pa di e forma aki miembronan di Parlamento por formula un opinion balansa a base di presentacionan ricibi.