Dialuna mainta despues di basta tempo e barconan di fruta y berdura a yega Aruba. Y Prome Minister Evelyn Wever-Croes, durante un rueda di prensa a splica cu gobierno no tin rol den esaki, ya cu nan no ta importa ni bende.
E agencianan local na Aruba, prome cu dia 5 di juni, a tuma contacto cu Venezuela. Nan a yega na palabracion y nan a ordo e fruta y e berdura y dialuna nan a yega p’esunnan cu a bestel. Ta un mercado liber cu gobierno no ta aden ni selecta e bendedonan, sino e agencianan.
Cierto momento e tabata mustra cu a tarda, ya cu a habri frontera dia prome di mei. Minister Geoffrey Wever a pensa cu por ta como gobierno tin cu bay wak dicon el a tarda y unda tin cu acelera. E no mester a hacie, ya cu siman pasa a confirma cu dos boto lo drenta. Por ta tin mas. E minister lo tin un rol den esey si ya cu kier drenta den contacto cu Venezuela, por ta pa haci un miho matching di kico Aruba tin mester y kico Venezuela tin pa produci.
Te asina leu, no tin envolvimento di gobierno. E ta puramente e mesun agente cu ta percura pa tin fruta y berdura di supermercado fo’i otro pais den region manera Colombia y/of Republica Dominicana, nan ta manda busca fo’i Venezuela.
