Aleluya! Despues di lesa lo siguiente, tur hende por comproba , cu no tin necesidad pa ningun hende ta esclavo di: bruheria, maldad, inmoralidad, adulterio,pasion bergonsoso, ni ningun actividad Vicioso.
Pasobra Dios den su inmenso Amor a haci tur locual ta posibel pa kibra tur cadena di diabel for di nos bida, asina nos por ta liber den Cristo Hesus (Juan 3:16-18).
Prome recordatorio
P’esey mi ta roga boso rumannan, pa medio di misericordia di Dios pa presenta boso curpanan como un sacrificio, bibo y santo aceptabel pa Dios, cual ta boso sirbishi spiritual di adoracion.
No sea conforme e mundo aki, ma sea transforma pa medio di e renobamento di boso mente, pa boso por comproba, kico ta e bon y agradabel y perfecto boluntad di Dios (Romanonan 12:1+2).
Di Dos recordatorio
Of boso no sa cu e inhustonan lo no hereda e reino di Dios? No laga nan gaña boso, ni fornicado, ni esunnan afemina, ni adorado di dios falso, ni adultero, ni homosexual, ni ladron, ni esunnan golos pa placa, ni burache, ni blasfemado, ni estafado, lo no hereda e reino di Dios.
Asina algun di boso tabata, ma boso ta laba, ma boso ta santifica, ma boso ta hustifica,den e nomber di Señor Hesus Cristo y den e Spirito di nos Dios (1 Corintionan 6-9-10-11).
Di tres recordatorio:
Pa encuanto di boso manera di biba di antes, boso pone un banda e hende bieu cu ta corumpi conforme e pasionnan engañoso. Y pa boso ta renoba den e spirito di boso mente, pa boso bisti e hende nobo cu ta crea segun Dios den husticia, pas y santidad berdadero (Efesionan 4: 22-24).
Tur hende tin e obligacion di cana den obediencia na Dios, pasobra esun cu no ta obedece Dios ta esclavo di diabel, por ta un hende tin placa y posicion. Y cu hopi orguyo y grandesa, y door di esey e no ta haci caso di e palabra di Dios.
Pasobra e ta pensa cu segun e, e ta bon, e ta cla. E ta sigui tur locual otro nan ta haci aunke e sa masha bon cu ta maldad y inmoralidad, pero e kier keda mantene su mes halto den su gremio.
Pero Dios ta amor y E ta pordona tur pica (Salmo 103:3) tambe Dios ta bisa lo siguiente; Cu si nos confesa nos picanan E ta fiel y husto di pordona nos, nos picanan y pa limpia nos di tur inhusticia (1 Juan 1:9).
Notabel ta cu hopi hende asina aunke nan ta rico, y nan ta bisa cu nan no tin mester di nada, toch nan ta pober, sunu, ciego, deplorabel y miserabel, pasobra nan ta biba cu nan wowonan ta fiha riba cosnan temporal y no e cosnan eterno cu Dios ta ofrece (Revelacion 3:17).
Ta dificil pa sigui biba den pica despues di a ricibi e gracia di e salbacion di Cristo Hesus, pasobra pa gracia nos ta salba. Pero gracia no ta duna nos e libertad pa keda den e bida bieu, y sigui den pica, no absolutamente, e gracia ta pa guia nos na santidad, pasobra sin pas y santidad ningun hende lo no mira Señor (Hebreonan 12:14).
E di cuater recordatorio:
Finalmente mi rumannan, tur loke ta berdadero, tur loke ta honorabel, tur loke ta husto, tur loke ta puro, tur loke ta bunita, tur loke ta di bon fama, si tin algun virtud,y si tin algo digno di alabansa, laga esakinan ocupa boso mente (Filipensenan 4:8).
Dios tene misericordia.
