Colombia a confirma su prome caso di Coronavirus awe diabierna, uniendo asina na varios otro pais Latinoamericano, cu entretanto ta purba maneha e virus cu ta contagia mas y mas ciudadano. E prome caso ta un mucha muhe di apenas 19 aña di edad cu a caba di yega Bogota for di Milan, Italia, dia 26 di februari ultimo.
Mester bisa cu Colombia a haya su mes confronta cu decenas di casonan sospechoso den varios ciudad, pero despues di somete testnan, a resulta cu ningun tabata casonan confirma di Coronavirus. Den e caso aki si e pashent a acudi na servicionan di salud na Bogota pa busca ayudo y eynan si a confirma cu e sintomanan cu e tin ta di Coronavirus, pa cual awor ta manehando e protocol y tin e pashent isola.
Ta bon pa menciona cu Colombia ta un mercado creciente pa Aruba, cu 2 vuelo diario for di Bogota cu Avianca y cu Wingo. Ademas nos tin Aruba Airlines cu ta biaha semanalmente pa Barranquilla y Medellin, despues cu recientemente a cancela e vuelonan directo pa Riohacha. Ainda tin varios alternativa via Panama cu COPA Airlines, den cual por haci conexionnan pa varios ciudad Colombiano. Bisando esey, diariamente avionnan ta yegando Aruba for di Colombia, sea cu turistanan of cu nos propio localnan cu ta bay pa vakantie, pa haci negoshi of pa bishitanan medico.
Tocante Coronavirus
E virus a nace y cuminsa na Wyhan, na China, na fin di aña pasa y entretanto a infecta mas o menos 100 mil hende mundialmente. Di acuerdo cu World Health Organization (WHO), a raporta e enfermedad den mas di 90 pais caba y e nivel di morto pa motibo di e enfermedad ta cerca di 3400 pashent.
Locual Bo mester sa di Coronavirus:
- E virus ta plama dor di tosamento y niestermento, pues via aire
- Esunnan cu no tin sintoma no ta un peliger tampoco pa pega cune of pega otro
- Cada pashent infecta ta pega un averahe di 2 pa 3 otro persona. E cifra aki por baha si preveni mas posibel
- Mayoria pashent tin keho di sintomanan di griep
- Casi tur caso di morto dor di Coronavirus ta di hende cu edad halto of cu tin un enfermedad cronico caba
