Colegio EPI ta organisa diabierna 13 di maart su anochi di informacion 2020 caminda lo duna informacion valioso na tur studiante di scolnan secundario. E anochi di informacion lo tuma lugar di 5:30 p.m. pa 8:00 p.m. den e Auditorium di Colegio EPI, caminda cu lo tin varios booth di informacion di e diferente formacionnan cu EPI ta ofrece.
Ademas cada unidad lo tin nan presentacion individual cu ta parti den dos sesion, esta di 6.00 p.m. pa 6.45 p.m. y di 7.00 p.m. pa 7.45 p.m. den e siguiente localidad:
Unidad C&T: lokaal CT10
Unidad H&T: lokaal CT11
Unidad S&S: lokaal CT 12
Unidad Economia: lokaal CT13
E entradanan pa e anochi aki lo ta GATE 10 ( banda di MC Donald’s) y GATE 9 (dilanti Prinses Amalia Basisschool).
Meta principal di e anochi di informacion ta pa informa studiantenan di scolnan secundario EPB, MAVO y HAVO tocante e opleidingnan/formacionnan cu tin na Colegio EPI y kico ta e rekisitonan di admision. Ta importante pa tene na cuenta cu pa wordo acepta pa un opleiding mester cumpli cu e profiel cu e opleiding ta exigi. Colegio EPI ta encurasha mayornan tambe pa bin cu nan yiunan pa asina duna guia y sosten den nan decision pa scoge un estudio.
Ora un studiante caba Colegio EPI e ta un profesional riba nivel intermedio (MBO). Hopi studiante ta dicidi cu nan kier sigui studia despues riba nivel HBO. Durante e anochi aki e studiante por haya mas informacion tocante esaki y tambe lo tin oportunidad di papia cu studiantenan actual di Colegio EPI y nan experencia na scol.
Pa e studiante cu ainda no ta sigur den cua ramo e kier sigui studia den futuro, Colegio EPI ta encurash’e pa pasa bishita tur e boothnan presente pa asina e por haya informacion di tur opcion cu Colegio EPI ta brinda Pa mas informacion di e anochi di informacion, un mapa di e campus y Colegio EPI en general por bishita e website na www.epiaruba.com.
