Dia 21 di april ultimo Aruba Excellence Foundation (A.E.F.) a cuminsa ofrece e curso online di Aruba Certification Program, conoci tambe como ‘Mi Compromiso’. A ranca sali cu e prome 6 klasnan virtual cu un total di 113 participante.
Debi na e situacion actual cu medida di ‘Shelter in place’ y cu hopi hende na cas, A.E.F. hunto cu Aruba Tourism Authority (A.T.A.), a ahusta contenido di e programa di certificacion pa provee e curso online y temporalmente gratis. Asina tur cu ta interesa pa grandece su conocemento di Aruba, tin e oportunidad pa haci e curso online den comodidad di nan cas. A ricibi mas di 900 registracion y diariamente ta ricibi mas registracion ainda. A.E.F. ta satisfecho cu e acogida y e interes demostra den ‘Mi Compromiso’ online.
Con e curso ta tuma luga?
Ta presenta e curso online na Papiamento via di e plataforma Zoom. Tin 5 sesion en total y cada un tin un duracion di 45 minuut. E participante ta ricibi tur informacion di antemano via email pa por participa.
E presentacion ta dos biaha pa siman, pues den dos siman y mei e participante ta bira ‘Aruba Certified’.
Con pa registra?
Pa registra por bishita e pagina http://www.acp.aw/en/register/ y asina cu registra lo ricibi mas detaye tocante con pa participa na e curso. Tuma nota cu cupo pa participantenan ta limita y esnan cu yega prome ta ‘bebe awa limpi’!
Pa mas informacion por manda un email na [email protected] of yama na 280-2924.
Aruba Tourism Authority a institui Aruba Excellence Foundation na juni 2018 y ta encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.).
Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, pa percura cu e nivel di servicio excelente di Aruba, por keda riba un nivel halto.
