“Den cualkier careda di cabay bo tin ehemplarnan cu ta faborito pa gana un careda, pero tambe bo tin e asina yama “batacazonan” cu t’ey djis pa t’ey y tin biaha di chiripa ta gana un careda! Hopi biaha nan ta resalta den un grupo di perdedo. Pero manera tin un dicho ta bisa: “tanten cu nochi no cera, careda di bina no a caba”! Y obviamente e articulo di UPP a stroba e fiestamento cu e supuesto logro di e batacazo di AVP den Parlamento, esta Dowers, cu e 25% di corte di salario. Algo cu pa mi ya tabata previsto cu lo bay pasa mirando con e parlamentarionan, esnan cu y otronan sin experiencia tabata bin ta trata e topico salarial y e crisis di COVID-19,” e lider di UPP, Booshi Wever ta bisa den un declaracion reaccionando riba su persona..
Wever ta bisa den e declaracion aki cu e supuesto exito y triunfo aki di AVP y Dowers ta wordo laga na filingrana cu loke UPP a trece dilanti. Un biaha mas ta wordo demostra cu en bes di keda riba e issue e batacazo Dowers kier desvia atencion mustrando asuntonan cu no ta kita nada di loke UPP a trece padilanti. Cada un punto cu el a trece dilanti UPP lo por refuta, un pa un, pero no ta bale la pena. Loke si ta resalta ta e hecho cu e NO ta nenga cu con bay bin e proposicionnan cu a ser treci den Parlamento ta actonan di populismo!!
Loke cu UPP no ta compronde dicon no ta reacciona “zakelijk” riba e berdadero pasonan cu mester ser tuma pa trece un solucion duradero, structural y realisabel!
“Y nos kier djis mustra riba kico lo por tabata e situacion si e reglanan estricto di “Good Governance” tabata “in place” caba. Cu e reglanan aki vigente kisas e batacazo Dowers lo no tabata tin e minimo chance pa competi mes, corda pa gana e corona pa ta e politico mas Populista!”
Djis un par di ehempel: si reglanan di Good Governance tabata vigente, un ATA-bank lo no tabata t’ey, na unda miyones a bay pa e ex-colega di e batacazo Dowers, algo cu por cierto e mesun Dowers a declara publicamente. Asina tambe lo e casi un BIYON di HOH lo NO tabata posibel, hincando asina Aruba den un debacle financiero.
E ta bisa cu si a bay di acuerdo cu su mocion na 2012 pa pone den e ley di comptabilidad cu pa desvia di cualkier destaho mester di un LB en bes di un MB, awe hopi otorgamento di contractonan lucrativo pa sponsornan y amigonan lo no por a tuma luga (renobacionnan di scol, incinerator chikito etc etc.). Tambe e gesto di parlamentario di RED, Ricardo Croes, pa loke ta su mocion, cu AVP no a vota voor, lo no tabata necesario, ya cu e cambio proponi lo encera cu na momento hasta di destaho bou man, Parlamento mester wordo envolvi debidamente y cu Gobernador tambe lo tabatin un posicion mas clave, prome cu patronahe politico tuma luga. Den e solucion aki, lo no stroba tampoco pa esnan ayega na un gobierno, por participa debidamente, sin ta wordo privilegia.
Si a bay di acuerdo cu un otro mocion cu e “schuldquote ” no por surpasa 45% y e deficit no por surpasa 3%, awe Caft lo NO tabata t’ey mes. Pero tanto fraccionnan di AVP y MEP a vota contra na 3 ocasion.
Si esakinan tabata “in place” awe sigur e yudansa for di Hulanda lo a bay mas facil, debi na e confianza cu nan tin den nos sistema y den e mandatarionan di Aruba.
“Ta p’esey un pregunta so mi kier a haci na e batacazo Dowers, ki dia bo ta presenta un ley initiativo cu ta encera introduccion di TUR e leynan pa percura cu Aruba lo wordo goberna drechi? Leynan entre otro riba financiamento di partidonan. Ley di ombudsman y “klokkenluiders”. Ley di screening di politiconan, cu by the way na 2017 e batacazo Dowers, no a percura pa para ora cu bay regla e posicion di colega di partido y di gobierno Paul Croes. Y tanten cu e leynan aki no bini, Aruba y e ARUBIANO lo keda ta e victima y cu na final lo paga e cuenta, manera pueblo ta pagando pe awor.”
Esakinan, e ta bisa, ta solamente 3 punto pa nan ilustra cu si Aruba su deficit real no mag surpasa 3% y e “schuldquote” tabata na 45%, awe facilmente kisas por tabata tin un “buffer”, “traha dam warda awa”, pa por a surpasa e retonan cu tin awor cu e crisis aki. Y si esey no lo tabata e caso mes, “nos lo por a haya un prestamo facilmente na un porcentahe hopi abou of kisas hasta “schenking” di Hulanda.”
