Tur partido a cuminsa pensa caba riba e eleccion parlamentario 2025. Pero den MEP lo no bay mira un cambio di liderazgo prome cu e eleccion di otro aña. Loke si lo bay mira ta un grupo nobo di candidato.
Recientemente a combersa cu e lider di MEP mr. Evelyn Wever Croes, kende a splica cu pa e proximo eleccion ta sigur cu e lo lidera e partido. Esaki na mesun momento ta confirma cu e lo sigui den politica.
Manera por corda, durante e ultimo Congreso, Dangui Oduber, tabata un candidato pa lider di e partido. Esey tabata na october di aña 2022. Congreso pa eligi un lider ta tuma luga cada cuater aña. E ta nifica cu e siguiente Congreso lo ta un aña despues di e siguiente eleccion. “Cu esey a pone e responsabilidad pa mi guia e partido den e siguiente eleccion. No tin ningun discusion riba esey y nos a cuminsa cu e trabounan caba,” Wever-Croes a declara.
Sinembargo e no ta nenga cu ta importante pa cuminsa traha y prepara pa reemplaso den futuro. “Mi no t’ey pa semper y mi no sa cuanto eleccion mas mi lo bay. Ta yega momento cu e partido mester di sanger nobo. Mi ta kere cu ora pueblo duna bo un señala cu bo tin cu bay, bo lo mester bay. No manera e oponente politico Mike cu ta manera e lema di WEMA cu el a bin pa keda. Pero hasta WEMA a bay.”
E mes ta kere cu liderazgo di un partido no ta den man di un persona so y den MEP mes tin hopi lider, tin hopi candidato cu tin aspiracion y cualidadnan pa bira lider. “Ta yega un momento cu mi lo pensa cu cos a yega t’e aki y mi lo traspas’e di un bon forma na e siguiente lider di partido.”
Mirando e siguiente eleccion cu ta practicamente denter di un aña, e partidonan ya caba a cuminsa traha nan plannan di campaña. Den esaki ta importante tambe pa mira kendenan lo participa den e siguiente eleccion. MEP ta conoci cu practicamente tur eleccion ta trece cambio den su lista y esun na caminda lo no ta diferente.
Por lo menos tin cinco candidato, segun e lider di MEP, cu a indica caba cu lo no bay eleccion mas. “Nos no tin reto pa candidato. Nos ta bayendo bon, aunke tin basta vacatura. Tin cinco colega cu a bisa di no ta sigui mas y den transcurso di tempo a entrega nan retiro. Tambe tin otro cinco a indica cu nan no ta mucho sigur di lo sigui. Por lo menos tin dies candidato cu lo bay busca pa participa den e siguiente eleccion. E ta hopi pero e interes ta grandi y nos ta den posicion pa recluta candidato,” e lider di MEP a duna di conoce.
Si analisa e lista di e ultimo eleccion e candidatonan cu lo a entrega nan retiro como candidato di MEP, y cu ta conoci, ta: Eddy Paris, Sue-Ann Ras, Setty Christiaans; Guilfred Besaril y e di cuater lo por ta Arturo Vallejo. E ultimo aki no ta mir’e na ningun actividad politico of den su funcion di parlamentario. Den e reunion di diaranson ultimo, riba e ley di matrimonio di mesun sexo, hendenan den tribuna no tabata sa mes kende e ta. E motibo ta cu e no ta activamente.
E otro cinconan cu a indica duda probablemente no ta caranan conoci, pero mas bien candidato patras riba e lista manera Rodymar Geerman, Erick Genser, Roderick Lopez, Jaime Winterdaal y Stephanie Croes.
Tin un Joe Koolman, kende tin e mesun rol cu Baba Herde y Norman Roos tin den AVP, yena espacio.
29. Rodymar Geerman
28. Erick Genser
27. Michella Lacle
26. Shannon Henriquez
25. Stephanie Croes
24. Gerrit Croes
23. Roderick Lopez
22. Eddy Paris
21. Rudy Richardson
20. Jaime Winterdal
19. Joe Koolman
18. Ricky Hoek
17. Marco Berlis
16. Sue Ann Ras
15. Darlene Guedes
14. Setty Christiaans
13. Ady Thijsen
12. Guilfred Besaril
11. Shailiny Tromp Lee
10. Alvin Molina
9. Edgar Vrolijk
8. Endy Croes
7. Hendrik Tevreden
6. Arthur Vallejo
5. Rocco Tjon
4. Glenbert Croes
3. Dangui Oduber
2. Xiomara Maduro
1. Evelyn Wever Croes.