E organisacion Professional Women Network a organisa ayera “Tax Reform anno 2019” na White Modern Cuisine na Gold Coast. Como orador invita a hiba palabra mr. Luenne Gomez-Pieters, siendo Director di Departamento di Impuesto (DIMP). E participantenan tabata hende muhenan profesional den tur area di trabou, sea nan tin nan mesun negoshi of cu ta traha na un compania of organisacion.
Hunto cu Mireille de Miranda y Anushka Lew Jen Tai, ambos Fiscalista na Ernst & Young, a splica mas di Reforma Fiscal. A contesta preguntanan riba e consecuencianan pa un negociante y kico por spera den futuro.
E ambiente durante e evento tabata masha bon mes, den cual e damanan, entre 40 pa 60 persona, a gosa di un bon biña y algun snacks, prome cu a cuminsa delibera riba asuntonan fiscal.
Separa di belasting, a elabora tambe riba con por stimula creacion di mas negoshi, con Departamento di Impuesto ta atende cu comerciantenan cu no ta cumpli banda di esunnan cu si ta paga sagradamente. E desaroyo aki ta forma un competencia inhusto entre comercio.
“Tur ta preguntanan valido”, asina mr. Luenne Gomez-Pieters a vocifera despues di e evento. Hasta despues di e parti oficial a contesta varios pregunta di e participantenan.
E director di DIMP a haci bon uzo di e plataforma aki pa comparti cu e damanan profesional aki riba con Departamento di Impuesto mes ta haciendo tur esfuerso pa mehora servicio, pa innova, digitalisa y simplifica e procesonan fiscal.
Departamento di Impuesto e aña aki ta enfoca riba digitalisacion, teniendo na cuenta cu ta uza hopi papel ainda. Imagina cu tur luna 13 mil contribuyente ta entrega nan declaracion di BBO-BAZV-BAVP na balie pa haya un stempel. Esey sin duda no ta aporta na eficiencia. A aloca fondo necesario den presupuesto 2019 pa Departamento di Impuesto por digitalisa e “aangifte” nan di tur luna, manera ta “Loonbelasting” y BBO.
“Pues nos ta den e trayecto di digitalisacion y lo enfoca mas riba e proyectonan rond di esaki. E slogan na DIMP ta people less – paper less, kier mira e contribuyente solamente ora cu di berdad e mester presenta pa firma of haci un pregunta. Pues pa tur otro asunto, incluyendo pagonan, e lo mester haci tur cos online. DIMP ta premira cu pa luna di december di e aña aki e proyecto aki lo mester ta ehecuta. E ora lo inicia e di dos tanda pa e declaracionnan di inkomsten en winstbelasting.
“Dus nos ta pusha pa e proyecto di digitalisacion por keda cla. Naturalmente nos tin un presupuesto e aña aki cu hopi reto, cu nos lo mester enfoca bon pa toch cumpli cu e metanan stipula pa cu nos presupuesto”, asina mr. Luenne Gomez-Pieters a termina bisando.
