Profesionalnan di WEB: Ton ta haci wega cu co’ serio!

Ayera dia 29 di augustus 2022, Gobierno di Aruba (GdA), Utilities Aruba N.V., WEB Aruba N.V. y N.V. ELMAR, a tene un conferencia di prensa pa informa pueblo kico e plannan pa energia renovabel di e “vision” y “plan energetico” di GdA ta encera. “Nos por a tende Minister di Energia papia di e extencion di e parke di molina di biento na Rincon y tambe di mas energia solar y e ta papia manera un cos cu ta un switch bo ta flip y e extra molina di biento y e extra energia solar lo funciona perfectamente”, asina Richard Frank, presidente di Asociacion di Empleadonan cu un Contrato Laboral Individual den Servicio di W.E.B. Aruba N.V. (“VWI”), a enfatisa.

“Nos ilustre director di Utilities Aruba N.V. ta papia di cu N.V. ELMAR, banda di WEB Aruba NV, tambe tin un concesion pa produci coriente. Esey ta corecto. WEB y ELMAR, tur dos, tin concesion pa por produci coriente, pero Utilities Aruba NO TIN tal concesion ni permiso legal pa produci ni distribui coriente. Awo e pregunta ta y ta keda: Si Utilities Aruba NO TIN un concesion ni permiso pa produci coriente e ora pakico, cueste loke cueste, Utilities Aruba NV kier lidera e Expression of Interest (EOI) di e expansion di molina di biento na Rincon?”, esey e asociacion di empleadonan di WEb ta puntra nan mes.

Ir. Richard Frank a studia como ingeniero kimico na Worcester Polytecnic Institute na Merca y despues na Eindhoven University of Technology na Hulanda. El a traha den refineria di Aruba y awendia tin 21 aña caba di experencia na WEB. E ta ocupa e funcion di Division Manager Production na WEB Aruba NV y alabes ta presidi e asociacion di empleadonan cu contract individual.

Utilities Aruba NV no tin licencia pa produci ni distribui coriente y tampoco pa haci ningun actividad ni iniciativa comercial cu ta encera compra of produccion of distribucion di coriente. Pero, NO MATTER WHAT, ta Utilities Aruba MESTER lidera e EOI aki di molina di biento y lagando e compania cu tin tur experticio, experiencia y recurso pa haci tal destaho na un manera profesional y obhetivo, esta WEB, keda sinta un banda ta keinta banki.

Pakico no ta laga e companianan cu tin e concesion pa produci coriente lidera e EOI aki? Utilities Aruba NV, cu sosten di Gobierno di Aruba, ta trapa flagrantemente riba e Good Corporate Governance Code cu zowel Utilities Aruba NV y Gobierno di Aruba ta bati riba nan pecho y ta bisa di ta pone na “prome luga” den e cuadro di “integridad” di gobernacion.

“Cu tur respet pa e director di Utilities Aruba NV, pero ta kico e sa di e materia di produci coriente cu molina di biento, zowel comercial como tecnico? Net net nada. Nos ministro di energia y nos director di Utilities Aruba NV ta pinta un ‘picture’ masha bunita y ta papia masha hopi sin bisa algo cu ta make sense y asina ta tira santo den wowo di pueblo”, segun Richard Frank ta opina.

Anthony Rojer a studia na Ir. Cesare terzano MTS na Aruba, despues na Gannon University na Merca pa Bachelor of Applied Sience Industrial Management y despues como Master of Business Administration Finance and Financial Management Services na The University of Southern Mississippi na Merca. Desde 2017 e tabata den Hunta di Supervision di Utilities Aruba N.V. y desde november 2021 a nombr’e como director di e compania estatal.

VWI, e asociacion di staff y profesionalnan di WEB, no ta contra produci coriente cu mas molina di biento. VWI no ta contra produci coriente cu mas energia solar. Al contrario, manera ta conoci caba, e strategia di WEB desde 2014 ta inclui mas energia di biento y mas energia solar. Pero, esaki tin cu ser plania y ehecuta na un manera tecnicamente y comercialmente responsabel y prudente sin metemento y interesnan netamente politico den e desaroyo di esaki.

“Futuro energetico di nos pais no ta un wega di mucha of un topico pa amateurnan politico (no ta porta di cua partido) of nan compinchinan, bin mete den dje. Laga e materia complica aki pa profesionalnan den e materia cu sa y cu TUR dia ta traha cu y den e materia aki”.

Un biaha mas: Utilities Aruba NV no tin concesion ni permiso legal pa pone un destaho di tal indole riba su nomber. E tal “Utilities Group” cu ta ser menciona no ta existi manera un entidad legal. Laga tal destaho pa e compania cu sa di e materia y di cual nan profesion ta encera proyectonan energetico grandi di tal indole.

Minister di Enegria, Glenbert Croes, a anuncia cu lo bin un di dos parke di molina di biento na San Nicolas. E biaha aki a scoge e are di Rincon pa instala e molinanan. Den pasado, e mesun partido na mando tabata contra binmento di un di dos parke na Urirama na Alto Vista, pero awe ta sigura cu esun na San Nicolas lo no tin efecto ni pa hende, ni pa bestia ni pa medio ambiente.

E conferencia di prensa di ayera tabata hopi suak y bashi den contenido. Cu Utilities Aruba NV, cueste loke cueste, kier pone e EOI aki riba su nomber y cu ta Utilities Aruba NV tin e “final word” den scoge cua compania ta bin sinta na mesa pa negocia un PPA di molina di biento, no ta normal, ta bay contra tur regla di bon gobernacion y ta duna di pensa riba posibel cosnan sumamente preocupante.

“E cos aki ta hole un otro Eagle LNG-style contract y cu un otro Non-Disclosure Agreement (NDA) geplak su tras! Dus, CERO transparencia! Manera e Hulandesnan ta bisa: mensen, waar zijn jullie nou alweer mee bezig?, asina e asociacion di empleadonan cu contract individual den WEB ta loco pa sa.

Noticia relacionaMas for di e autor