Fundacion Escuela KoHeHe ta boga pa un hubentud sano y ta promove e balornan principal; cuido, amor y responsabilidad bou di nos mucha- y hobennan cu yudansa di agricultura.
Duna atencion na nos muchanan lo ta di hopi beneficio pa nos comunidad. Pa por logra hoben sano, nos mester contraresta pobresa den su totalidad. Esey kiermen logra hobennan cu confiansa propio.
Hoben cu ta tuma iniciativa pa yuda otro, yuda nan mes y cu ta expresa nan idea libremente. Hoben ku ta stima e naturalesa di Dios y ta consciente di e balor pa cu agricultura, tambe cu ta dispuesto na yuda cuida nos naturalesa. Nos ta consciente cu mucha- y hobennan den pobresa pa cu alimento dificilmente por keda educa. Pa es motibo aki Escuela KoHeHe ta siña e mucha- y hobennan con pa produci nan mes cuminda. Futuro di Aruba ta depende dje calidad di atencion cu keda duna na nos muchanan.
Mayornan por fabor laga nos ban laga e idea di produci nos mes fruta y berdura biba bou di nos muchanan. Nos mester cuminsa crea agricultornan y cunukeronan nobo. Tin hopi mucha cu ta falta norma y balornan. Mucha cu falta di cuido, amor, balor propio y proteccion. Cu agricultura mucha y hoben ta biba e balornan principal, cu ta cuido, amor y responsabilidad. Meta di Fundacion Escuela KoHeHe ta pa conscientisa nos muchanan e gran balor di agricultura. Fundacion Escuela KoHeHe ta boga pa hubentud sano. Mucha mester sa cu agricultura tin futuro aden. Agricultura ta un metodo pa contraresta pobresa den diferente area. Entre otro, pobresa mental, pobresa di educacion y formacion, tambe pobresa di alimento, salud etc. Mucha mester ta na altura cu nan por gana nan pan di cada dia practicando agricultura tambe. Kiermen cu ademas di bira dokter carpinte, etc, por bira agricultor/cunukero tambe.
Agricultura mester bira curiculo/ vak na scol. Hopi hoben y adulto tin informacion robes tocante agricultura; ta pensa cu plantamento di fruta y berdura ta trabou di catibo, otro ta pensa cu nan no kier traha den solo cayente, cu e trabou di plantamento ta pa hendenan bobo sin scol, agricultura ta un funcion pa hende di nivel educacion abou, etc. Kiermen cu hoben y mucha tin asina tanto informacion malo, robes di agricultura, cu practicamente ningun hoben of mucha no kier bira agricultor, plantado di fruta y berdura. Pero Fundashon Escuela KoHeHe t’ey pa conscientisa y traha na bienestar di mucha, hoben y adulto.
Fundashon Escuela KoHeHe ta spera un reaccion di mayor mas pronto cu ta posibel.
