Dialuna mainta tabata un momento hopi special tanto pa e alumno- como e docentenan di Colegio San Augustin MAVO cu motibo di develacion di nan logo nobo. Un logo cu como team nan a cuminsa traha riba dje desde aña escolar pasa.
E logo nobo lo carga e scol pa e proximo añanan y tambe en bista di e celebracion di e 65 aña di existencia di e scol. Elliënne Riatiga, docente di Papiamento a duna un splicacion di e nificacion di e simbolonan di e logo nobo di Colegio San Augustin MAVO.
SHOCO
E shoco ta representa inteligencia, cu ta e poder cu ta hiba na un futuro briyante. Tambe CSA kier stimula su alumnonan pa ta persona independiente y responsabel den nan comunidad. E shoco ta caracterisa pa su wowonan profundo y oido skerpi. Mescos cu e shoco, e docentenan por analisa y observa pa reconoce e necesidad di cada alumno y pa guianan den tur area, cu enfoke riba e area social y emocional. Un ser humano emocionalmente stabiel pro surpasa tur obstaculo.
BIJBEL
Na Griego, bijbel ta nifica buki. E bijbel ta un elemento crucial den e fundeshi catolico, cu ta yuda fomenta norma y balor den e alumnonan di e scol. Mescos cu e bijbel ta e instrumento cu ta guia den e aspecto di trivalidad, ta uza e buki como guia pa traspasa conocemento pa e alumnonan di e scol.
Tambe ta haya e colornan blauw y geel cu ta refleha hopi riba e logo nobo di e scol.
BLAUW
E blauw ta representa trivalidad, intuicion, inspiracion y paz interior. Esaki ta e cualidadnan cu nan kier inculca den nan alumnonan pa yuda forma un ser humano fuerte den nos comunidad. Tambe e ta representa e lama cu ta rondona nos isla. .
COLOR GEEL
E color geel ta representa e briyo di solo cu e pueblo di San Nicolaas ta lanta cu ne tur mainta.
BOMBIO
E bombio ta representa e docente cu ta carga e conocemento y ta traspsasa esaki pa su alumnononan den un mundo di enseñansa cu ta den transicion constantemente. Ta tene cuenta cu e habilidadnan fundamental di siglo 21.
