Pa mas di un aña caba e ta sufri di cancer na weso y a gana varios bataya den e lucha, pero awe mainta a perde e guera cu 72 aña di edad. Prinses Christina, e ruman muhe mas chikito di Prinses Beatrix, a fayece awe mainta na e compleho di Paleis Noordeinde, asina SM Rey Willem Alexander y Maxima a anuncia.
Prinses Christina a naci dia 18 di februari 1947 na Paleis Soestdijk. E tabata e di 4 yiu muhe di Prinses Juliana y Prins Bernhard, e yiu mas chikito di famia. For di edad hoben caba el a scoge pa keda for di atencion publico. Mas despues el a hasta cambia su nomber, pasobra e yama originalmente Prinses Marijke, pero a opta pa uza su di dos nomber.
Durante cu Prinses Juliana tabata na estado di Marijke, el a haya “rodehond” cu consecuencia cu e yiu a nace cu dificultad na un di su wowonan.
Na aña 1975, Prinses Christina a casa cu Jorge Guillermo, cu kende el a haya tres yiu, Bernardo, Nicolás y Juliana. Como cu el a casa sin permiso di Parlamento Hulandes, el a perde e oportunidad pa bini na remarca pa e trono Hulandes. Sinembargo, el a divorcia na aña 1996. El a opta pa biba mayoria di su bida na New York y na Italia.
