Richard de Meij ta un yiu di tera, naci y lanta San Nicolas. Cu 18 aña di edad, el a dicidi di studia afo. E tabata tin e opcion pa studia sea na Hulanda of na Merca.
E tempo ey el a dicidi pa studia na Merca, pa motibo cu e tabata kier pa mehora su Ingles y a sinti cu e tempo ey caba cu su Hulandes tabata bastante bon, ya cu e tabata tin 12 aña di enseñansa na Hulandes.
Docente na Merca
Actualmente de Meij ta un docente na Merca. Na cuminsamento, el a dicidi di studia logopedie of fonoaudiologia. Tambe el a studia linguistica aplica. Unabes cu el a caba cu su estudio, el a dicidi di bin bek Aruba. Lamentablemente e tempo ey, no por a haya trabao den loke el a studia.
A traha na Aruba durante tres aña y mey den hoteleria y tambe a traha como interprete y traductor na corte. Ya cu e no a traha den loke el a studia p’e, el a sinti cu e no tabata bay dilanti manera cu e tabata kier. El a dicidi e tempo ey pa bolbe Merca pa wak ki su posibilidadnan lo tabata pa e sigui den e ramo cu el a studia p’e.
El a tuma e decision pa bolbe y a haya trabao como meneer di scol pa duna les di varios idioma.
E tempo ey tambe, e otro opcion cu e tabata tin tabata pa purba di duna les di idioma na Aruba. Pero nan a inform’e tur caminda cu esey lo ta hopi dificil, ya cu su diploma y estudio tabata di Merca. Na Aruba tabata uza un sistema Hulandes. Pa e duna les di Spaño, Frances of Aleman, lo ta casi imposibel. E sistema di educacion no tabata compatibel. Esey a bis’e e tempo ey.
Premio obteni
Segun de Meij, e premio cu el a ricibi a bin inespera. Esey no tabata algo cu nunca el a pensa di dje. Un di su supervisornan di scol a dicidi di manda su nomber pa e estado di Connecticut. Cada estado na Merca tin un organisacion profesional di e estado cu ta supervisa, cu ta determina kico ta standard den enseñansa di idioma. Esun di Connecticut yama Connecticut Council of Language Teachers. Esey ta cay bao di e organisacion di mas grandi di lenguahe na Merca cu yama the American Council of the Teaching upon Languages.
Unabes cu a manda su nomber aden hunto cu e nombernan di masha hopi docente cu ta dunando les di idioma, a cuminsa e proceso di evalua cada candidato pa wak ken merece e titulo di Language
Teacher of the Year.
E proceso tabata di varios entrevista. Mester a entrega CV. Tambe mester a pone hunto un pakete di varios cos cu nan a pidi. Por ehempel e sistema di duna les, filosofia di enseñansa di idioma. Su contribucionnan na e vak mes di duna les y tambe e profesionalismo y conocemento, investigacionnan cu de Meij a yega di haci. Unabes cu a entrega tur esakinan, a haci un evaluacion y a reduci e cantidad pa cinco. E cinco nan ey tabata finalista. Ora cu a haci e di dos entrevista, a bin resulta cu a premia de Meij cu e titulo di Language
Teacher of the Year.
E privilegio di papia cuater idioma
Segun Richard de Meij, na Aruba en berdad tin e privilegio di ta multilingual cu cuater idioma. De Meij tambe a lansa cu esey y unabes cu a bay Merca, a ripara cuanto aprecio Merca y tambe full mundo tin pa esey. Mericanonan ta pensa cu unabes cu nan tende cu un persona ta papia cuater idioma, cu ta algo maraviyoso.
Esey pa nos na Aruba ta normal. Lamentablemente na Aruba, apesar di e privilegio ey, hopi biaha loke ta sosode cu nos no ta aprecia esey na e mesun nivel cu hende di afo ta aprecia loke nos por. Tambe hopi biaha nos ta yega na un cierto nivel di e idioma y nos no ta bay mas leu cu esey. Nos na ta papia Ingles na Aruba, riba cierto nivel, pero e ta para eynan. Nos no ta yega profundisa nos mes mas aleu na Ingles of na Spaño.
Hopi biaha nos ta scucha un Spaño basta bon papia na Aruba, pero cu hopi Papiamento den dje.
Segun de Meij, mester tin un interes pa profundisa nos mes den e idiomanan cu nos ta papia na Aruba. Esey ta loke cu e ta haya tambe ta algo cu nos mester cuminsa den nos enseñansa pa balora mas e idiomanan cu nos tin aki y e facilidad cu nos tin pa siña e idiomanan ey.
