Diamars mainta a surgi un momento di discusion, diferencia di opinion, entre e miembro di fraccion di MAS drs. Marisol Tromp y Presidente di Parlamento mr. Edgard Vrolijk. Esaki tabata relaciona cu e tema di e reunion.
Tabata dia 23 di februari, 2023 cu tres miembro di oposicion a manda un peticion na Presidente di Parlamento mr. Edgard Vrolijk pa yama un reunion publico cu e tema: “Het inefficiente, niet transparente en frustrerende immigratiebeleid van het Kabinet Wever Croes II en de gevolgen daarvan voor alle betrokkenen”.
Y esaki mester tabata tema di e reunion cu a cuminsa diamars (16 di april, 2024) pa 9:00 AM. Sinembargo den di cinco minuut di e reunion, parlamentario Tromp a pidi un punto di ordo. Aki el a splica cu no ta prome biaha cu nan ta mira eror den e “oproeping” di un reunion. Den esun di diamars mainta ta poni como punto di agenda cu e minister ta bin duna un “Toelichting door de Minister van Arbeid, Energie en Integratie, dhr. G.F. Croes over zijn aanpak van het immigratiebeleid.”.
E parlamentario a bisa “mi kier corigi cu esaki no ta e punto di agenda. Nos no a bisa cu nos kier un toelichting.” Y el a sigui splica cu e peticion ta pa un reunion cu e tema ariba menciona. “Mi ta corigi esey y mi kier pa e wordo drecha”.
Tabata parce cu e peticion aki no a cay mucho na agrado di Presidente di Parlamento, kende a reacciona di forma emocional, actuando manera un meneer di scol cu ta hala atencion di un di su studiantenan. “Esaki ta contene loke cu a manda y e tabatin mas cu un siman riba e oproeoing y sra. Tromp, kende tabata ayera tambe na trabou y por a pasa na administracion. Señora Tromp ta un ex-presidente di parlamento un tempo, sa e proceduranan y sa unda mester bay pa corigi’e. Si tabatin un coreccion pa haci, por a hacie, awo ta keda locual ta eyriba. E reunion ta sigui manera e ta y tabatin tempo suficiente pa atende cu esey.”
