Un parlamentario di MEP a sali padilanti e siman aki y bisa cu MEP a aumenta e pensioen di biehes cu 228 florin den 7 aña segun su propio declaracion. Es decir un aumento di 20 florin pa aña. Segun MEP, esey ta suficiente y responsabel pa duna. E mesun parlamentario cu a drumi cu otro dos colega den mesun camber di hotel na Hulanda pa spaar daggeld vergoeding di 400 dollar pa dia, placa di pueblo pa hinca den nan saco. Y un otro parlamentario di MEP ta declara cu biahamento ta necesario y importante. Tin un solo minister cu ta Minister di Energia cu den 7 aña a gasta casi mey miyon florin na viahamento. Asina publicamente partido MEP ta bisa cu nan ta contra e aumento aki.
Partido Mep mester compronde y sa cu 7 aña pasa bestaansminimum tabata 1000 florin menos. Esaki ta segun data di CBS y no inventa pa ningun hende, sigur no pa AVP. Shete aña pasa nos pensionadonan no mester a paga pa remedi, shete aña pasa coriente y awa tabata na mita prijs. Shete aña pasa no tabata existi e medida di BBO na frontera, cu ta yiu di e BBO original cu partido MEP ta tata y mama di dje, pasobra ta partido MEP a trece e yiu aki na mundo cu yama BBO. Shete aña pasa Aruba no tabata asina caro cu e ta awo, door di tanto medida imponi ariba pueblo.
Awo ta sali yen di grito di angustia pa si un aumento di 50 % ta realistico si of no. E por ta realistico di awo caba y sigur despues cu nos a tuma nota den un entrevista cu director di SVB a declara, cu cualkier aumento lo mester sali for di caha di gobierno. Si MEP corta den gasto di biahamento rond mundo y tambe gobierno uza e 500 miyon extra den presupuesto door di medidanan poni ariba lomba di pueblo y ta gaba cu tin surplus di mas di 50 miyon,por duna e aumento aki sin ningun problema.
Hopi grito di auxilio ta saliendo for di comunidad y e organisacionnan pa basta aña caba cu ta bisa cu nos pensionadonan ta pasando den miseria y placa no ta yega nan y awo cu AVP ta sali padilanti cu mester duna e aumento substancial aki y si ta duna oido na e gritonan aki, awo tin partido politiconan y tambe otronan ta manera spanta y ta bisa cu no ta realistico un aumento asina.
Si no haci caso di un departamento manera un CBS cu ta bisa cuanto placa un pensionado mester pa biba ,anto pakico existencia di un departamento asina anto?? Kico lo ta e balor anto di un departamento manera CBS cu ta bisa algo,anto nos tur na Aruba ta keda brasa crusa y no ta haci nada pa cu e problema aki. Keda para wak so ? no haci nada? Esey hamas lo por ta e pensamento, si di berdad nos ta kere den DIOS y cu nos mester stima nos prohimo,manera nos ta stima nos mes.
Partido MEP y otronan mester compronde cu ni cu e 50% di aumento aki ,ainda e no ta yega e bestaansminimum di 2450 florin cu un penshonado soltero mester pa biba,segun CBS. Pero sikiera e ta yega un poco mas cerca di e cifra aki.
Penshonadonan y pueblo mester puntra Partido MEP y e parlamentario aki , si e lo por biba cu 1265 florin pa luna, anto wak kico lo ta su contesta.
E aumento cu Partido AVP den gobierno lo duna nos penshonadonan, ta un deber, un mester y un aumento cu ta realistico y sostenibel. Pa e gobierno di MEP esaki ta imposibel pasobra biahamento rond mundo ta mas necesario cu duna un aumento na nos pensionadonan.
