Den un carta manda diahuebs, 13 di januari, lider di partido PPA, Lisette Malmberg a manda un serie di pregunta na presidente di parlamento, mr. Edgard Vrolijk, riba e situacion di COVID na Aruba y tambe riba e vacunanan.
Esaki ta den cuadro di un carta cu Departamento di Salud Publico (DVG) a manda pa su empleado y departamentonan, cu fecha dia 22 di november 2021.
Relaciona cu e carta aki, PPA ta haci parlamento e siguiente preguntanan:
Ya cu e carta aki ta un violacion considerabel di e derecho di e ambtenaarnan y tambe ta un norma discriminatorio y ta separa nan, PPA kier a puntra con por emiti tal medida p’e Departamento di Salud Publico na Aruba? Den ki medida parlamento di Aruba a tuma nota di esaki y ki ta su opinion riba dje? Den ki articulo di ley y e reglamentonan di Aruba a basa e carta aki?
E carta aki no tabata firma pa un director, sino un ‘management team’ temporal.
Riba e management team, con ta relaciona e herarkia mientras cu un director formal di DVG ta sigui na cabes?
A emiti e carta aki den nomber di Minister di Salud y Turismo di Aruba? Kico ta su opinion riba esaki?
Politica di Aruba ta basa riba eleccion liber. Te na ki punto ta trata di un caso di obligacion di vacunacion?
Gobierno kier un bon gobernacion y bon practica di trabao. Ki ta e opinion di parlamento riba e contenido di e carta aki dirigi n’e funcionarionan di gobierno cu ta traha den DVG?
Den ki norma huridico ta basa e carta aki pa crea un separacion di derecho entre e personanan vacuna y no vacuna?
Tabatin algun revision legal prome cu a emiti e maneho aki? E maneho emiti ta permisibel p’e funcionarionan? Den ki medida ta existi un base legal p’e maneho aki? Te ki punto ta un cuestion di subsidiariedad y proporcionalidad?
Den ki medida e sindicato di e funcionarionan a participa.
PPA ta pidi parlamento pa discuti e preguntanan aki cu e ministernan responsabel.
PPA kier sigui contribui pa mantene parlamento na altura y sigui formula pregunta critico cu ta spera pa contribui di forma constructivo na nos debate nacional.
Parlamento lo converti asina den un miho organo di supervision y control di nos gobierno, cu e obhetivo pa mehora e transparencia y bon gobernacion.
Te aki e carta di partido PPA.
