E sindicatonan cu ta hibando un lucha contra e 12.6%, entre otro SEPPA, SIMAR, SPA entre otro tabata na oficina di mediador di gobierno, pa asina purba di yega na un solucion p’e recorte.
Mediador di gobierno, Anselmo Pontilius, a comenta di a tuma nota di e discusionnan publico cu carta entre e sindicatonan y gobierno, viceversa. Segun mediador, ta mas prudente cu e partidonan, irespecto nan diferencia di opinion, bay mesa. Na final ta na mesa por resolve tur loke ta diferencia di opinion. Den e caso aki no mester lubida cu e empleadonan publico, nan sindicato tin un cantidad otro asunto cu mester ta atendi, particularmente cambio proponi den no solamente condicion di trabao, pero e ley (LMA), cu ta rigi e derecho di e trahadonan.
E prome punto aworaki ta con por logra a corto plaso. A manda un nota pa prome minister y minister di labor pa mira si mas pronto posibel por haya e partidonan na mesa.
Mediador di gobierno y su parti ta dispuesto pa redacta un of otro protocol pa mira cu por ta un apertura p’e combersacion.
E puntonan cu kier hinca den e protocol, a trat’e cu e sindicatonan, segun Pontilius. E dirigentenan a expresa nan disponibilidad pa sinta mesora cu gobierno y esey ta bay manda bisa gobierno pa mira den e proximo dianan cu ta bin, pa sinta na mesa y trata di habri un dialogo formal riba no solamente e recorte di salario, pero tambe riba otro proposicion cu por ta alternativa y trata di resolve gradualmente e diferencianan cu tin.
Pa un cobertura mas amplio lesa e edicion di TREMPAN di mañan.
