A funda Partido Pueblo Orguyoso y respeta (POR) apenas 8 luna pasa den Cas di Cultura, cu Otmar Oduber, Andin Bikker, Serge Mansur y Stephen Daal den directiva. E partido a nace di un fusion entre PDR di Andin Bikker y Otmar Oduber. Nan a participa den eleccion di 22 di september ultimo y a logra 5531 voto cu ta bon pa 1 asiento y 1 restzetel, pa suma 2 asiento den Parlamento di Aruba.
E resultado ta bon y malo, depende di cua banda ta mire. Si mire como un partido “nobo” cu apenas a lanta 8 luna pasa y a saca 2 asiento caba, e ta bon! Pero, si considera cu ta trata aki di “continuacion” di un partido existente, PDR, cu a logra 4518 voto den eleccion 4 aña pasa, pues cu a bay dilanti cu apenas mil voto, e ora e ta descepcionante. Si tene na cuenta cu na 2013, e top tres, Otmar Oduber a logra 4008 voto, Andin Bikker a logra 3047 voto y Marisol Lopez a haya 1642 voto, cu hunto nan tres tabatin 8697 voto, anto ta realisa masha lihe cu nan a bay hopi atras. Ta un trabou grandi a tuma luga, un inversion miyonario, pa logra djis un “restzetel” y mil voto extra cu Andin Bikker mes tabatin caba na 2013 cu PDR.
Asina mes, e realidad politico ta cu POR tin 2 asiento y cu esey ta haci nan e unico yabi pa e siguiente gobernacion. Sea ta cu AVP of MEP, den tur scenario nan mester ta den Gobierno sino no tin un coalicion.
Den politica tur cos ta posibel, pasobra mester sigui e mandato di pueblo. Pero MEP a entrega keho penal contra Otmar Oduber algun luna pasa, relaciona cu posibel corupcion na ATA, etc. Pues e relacion no ta den un bon estado pa cera un coalicion facil. Tambe tin e aspecto di Marisol Lopez cu a sali na malo for di MEP y cu a keda cu un mal relacion cu Evelyn Wever, tambe lo pisa awo riba e decision pa forma of no.
Pero bolbiendo bek, POR ta keda yabi di e siguiente Gobierno y no tin ningun opcion sin nan den coalicion. AVP a anuncia caba cu nan no ta interesa pa traha cu POR y como tal a opta pa bay oposicion, asina lagando e opcion pa MEP-POR of MEP-POR-RED.
Criticonan di politica ta premira cu e proceso di informacion y formacion lo no ta facil.
